Ұшақ өндірісінде әлемнің үшінші алпауыты атанған Бразилияның Embraer компаниясы елімізде техникалық қызмет көрсету бойынша өкілдігін ашуға ниетті , деп хабарлайды 24kz.

Ядролық энергетика саласындағы осы елдің Amazul агенттігі де уранға бай Қазақстанмен ынтымақтастықты жетілдіруді қалайды. Осы және өзге де стратегиялық серіктестік тетіктері Премьер-министрдің орынбасары, Сыртқы істер министрі Мұрат Нұртілеудің Бразилияға сапары аясында талқыланды.

Ердана Ержанұлы, тілші:

- Қазақстан Республикасының Премьер министрінің орынбасары, Сыртқы істер министрі Мұрат Нұртілеудің Бразилияға БРИКС саммиті аясындағы іссапары дәл осы тарихи нысаннан басталды. Итамарати сарайы Рио-де-Жанейро Бразилия астанасы болғанда осы елдің Сыртқы істер министрінің негізгі жұмыс орны болды. Міне, осы тарихи ғимаратта Бразилия-Қазақстан қарым-қатынасының дамуына жаңа серпін берілгелі отыр.

Бразилияның сыртқы істер министрі Мауро Виейра қазақстандық әріптесін жылы шыраймен қарсы алды. Мұрат Нұртілеу нысанның тарихи құндылығына назар аударып, екі елдің астаналарын көшірудегі ұқсастығына мән берді. Басқосуда тараптар сауда экономикалық ынтымақтастықты берік ете түсуге уағдаласты. Соған сай, келесі күн де қарбалас басталды. Мұрат Нұртілеу бразилиялық кәсіпкерлермен кездесіп, ұсыныстар мен мүмкіндіктерді саралады.

Касиано Перейра Виана, «Бразилия-Қазақстан» Сауда палатасының президенті:

- Ең үлкен мәселе – логистика. Бразилия мен Қазақстан арасын қалай тиімді жалғаймыз деген сұраққа жауап іздеп жатырмыз. Салаларға келер болсақ, тау-кен өндірісі, ауыл шаруашылығы және заманауи технология бойынша ынтымақтастық орнатуды көздеп отырмыз. Тіпті серіктестікке тың серпін беру үшін екі ел президенттерінің өзара іссапарын ұйымдастыру жағын қарастырып жатырмыз.

Еуразиядағы логистика хабына айналған Қазақстанның жоғары лауазымды өкілімен кездесу мүмкіндігін оңтүстік Американың алпауыт компаниялары да қалт жібергісі келмеді. Біздің тараппен басқосуға электр моторлары мен автоматтандыру құралдарын шығаратын бразилиялық алпауыт WEG компаниясы қос бірдей өкілін жіберді. Әуе кемелерін шығару бойынша әлемде үшінші орын алатын Embraer-дің президенті Францсиско Нето өзі келіп, Қазақстанда аймақтық техникалық қызмет орталығын ашу бойынша министрмен пікір алмасты.

Франциско Нето, Embraer компаниясының президенті:

- Азаматтық авиация, алыс шаһарларды байланыстыру және қорғаныс саласында пайдалы бола аламыз деп сенемін. Әсіресе, біздің C-390 атты ұшағымызға сұраныс көп. Cол үшін бар мүмкіндіктерімізді бағалап, қай жерде тиімді бола алатынымызды қарастырып жатырмыз.

Қазақстандық нарыққа қызыққан тау кен өндірісіндегі «Vale» компаниясы, түрлі бағыттағы автобус құрастыратын «Мarcopolo» бренді, ас үй, құрылыс және электр құралдарын шығаратын «Tramontina», ядролық және қорғаныс технологияларын дамыту бойынша Бразилияның ең ірі стратегиялық агенттігіне айналған «Amazul» да қызығушылық танытты.

Ньютон Нето, Amazul компаниясының президенті:

- Министрмен өте мазмұнды кездесу болды. Компаниямыздың әлеуетін таныстырып, уран өндіруден алдыңғы қатарда тұрған Қазақстанмен қандай бағыттарда серіктестікті дамыта алатынымызды сөз еттік. Радиофармацевтика, ядролық медицина және зерттеу реакторларына қызығушылық жоғары.

Кездесулер кәсіпкерлермен дөңгелек үстелге жалғасты. Бразилияның ұлттық өнеркәсіп бірлестігі мен осы елдегі дипломатиялық өкілдігіміз ұйымдастырған іс-шараға түрлі штаттар мен муниципалитет өкілдері де қатысып, өңіраралық байланыстың дамуына жол ашылды. Елімізге инвестиция құюдың тың тетіктері таныстырылды. Нәтижесінде Шығыс Қазақстан облысы мен Санта-Катарина штаты, Қазақстан машина жасаушылар одағы мен Бразилияның өндірісті дамыту агенттігі және инвестиция тарту бойынша «Kazakh Invest» ұлттық компаниясы мен «Von Bohlen Halbach» компания арасында ынтымақтастық жөнінде меморандумдарға қол қойылды.