Биыл шекара қызметінің құрылғанына 33 жыл.

Мыңдаған әскери қызметші құрлық пен суда қызмет етіп, ел іргесінің тыныштығын қамтамасыз етіп жүр. Олар елдің шетінде, желдің өтінде жүріп 5 мемлекетпен шектесетін 15 мың шақырымнан астам аумақты күні-түні күзетуде. Соның ішінде шекаралық бақылау пункттерін ерекше айтуға болады.

Мереке қарсаңында Астана шекаралық бақылау бөлімінің қызметімен таныстық. Олар тәулік бойына әуежай арқылы елге кіріп-шыққандарды тексеріп, мұқият қадағалайды. Күніне шамамен халықаралық бағытта 100-ге жуық рейс ұшып-қонады.

Ержан Тоқтасынов, «Астана» шекара бақылау бөлімінің қызметкері:

- Шекара қызметі заман талабына сай өз қызметтерін жасайды. Инновациялық технологияларды және заманауи электронды жүйелерді қолданып, шекарамызды берік күзетуде. Шекара қызметінің жеке құрамы Қазақстан президенті мен халық қойған талаптарға сай ел шекарасын кез келген қолсұғушылықтардан күзетіп, қорғауда.

Шекарашылар еліміздің бет-бейнесі. Бізге келген әр шетелдік азамат ең бірінші дәл осы әскери қызметшілермен тілдесіп, көрісіп барып Қазақстан туралы ой түйеді.

Астана әуежайында жыл сайын жаңадан халықаралық бағыттар ашылып жатыр. Сәйкесінше келушілер ағыны артып, адам қарасы көбейді.

Былтыр шілде айында шамамен 330 мыңдай жолаушы шекаралық бақылаудан өтсе, биыл олардың саны 360 мыңнан асқан.

Бауыржан Бастаубаев, «Астана» шекара бақылау бөлімінің бақылаушысы:

- Жолаушылар саны артқандықтан жұмысқа соғұрлым жауапкершілік күшейді. Және онымен бірге құқық бұзушылық фактілері көбейді. Мәселен, 2024 жылы жыл басынан бері 1800 құқық бұзушылық болса, 2025 жылы 2200-ге жетті.

Иә, бақылаушылардың еңбегі ерен. Олар әсіресе есірткі заттарын тасымалдайтындар мен халықаралық іздеудегі қылмыскерлердің жолын кесіп, елге кіріп-шығуына мүмкіндік бермейді.

Дастан Ықыласов, кинолог:

- Ит қазір жолаушылар арасында есірткі затын іздеу барысында. Негізгі қызметіміз осы. Есірткі затын тасымалдауға жол бермеу ғой. Кинолог болған қызық мамандық деп ойлаймын.

Тілші: Осындай тексеріс кезінде қандай да бір есірткі табылған кездер болды ма?

- Есітрткі табылған кездер болып тұрады. Бұл иттің лақап аты Турандот. Мұны Алматы қаласында арнайы иттерді дайындайтын орталық бар. Сол жерде күшік кезінде береді бізге. 4 айлық кезінде аламыз. Әрі қарай үйретеміз.

Қазір елде 101 шекаралық өткізу пункті бар. Оның ішінде Ресеймен – 51, Қытаймен – 7, Қырғызстанмен – 8, Өзбекстанмен – 11, Түрікменстанмен – 2 бақылау бекеті жұмыс істеп тұр. Қосымша 3 теңіз және 19 авиациялық пункт бар.

101 шекаралық бақылау пункті бар:

Ресей – 51

Қытай – 7

Қырғызстан – 8

Өзбекстан – 11

Түрікменстан – 2

Теңіз пункті — 3

Аваициялық пункт – 19

Айнұр Қасымова, «Астана» шекара бақылау бөлімінің қызметкері:

- Қазір біз жұмыс барысында жаңа технологияларды қолданамыз. Қазір ол біздің жұмыс барысымызды өте жеңілдетіп жүр. Мысалы, паспортты жедел өткізетін автоматтандырылған жүйелер, геометриялық сканерлер және шекаралық бақылау деректер базасына тікелей орнатылған құрылғылар солардың бәрі біздің сапамызды жақсартуда. Басында әр жолаушының өткізу үшін шамамен 3-4 минут уақыт алатын. Қазір шамамен 20-30 секунд алады.

Бүгінде бақылаушылардан бөлек мыңдаған шекарашы өркениеттен алыс, жақындарынан жырақта жүріп, еліміздің қауіпсіздігін қамтамасыз етуде. Олар қазірдің өзінде тау-тас кезіп, өзен-көл кешіп, жерімізді қырағылықпен күзетіп жүр. Шекара шебінде қызмет ету екінің біріне бұйырмайтын бақ.