5 наурыздан бастап «Наурыз» ипотекалық бағдарламасына құжат қабылданып жатыр, деп хабарлайды 24kz.

Жалпы бұл бағдарламаға ел тарапынан қызығушылық жоғары.

Мәселен, портал ашылған алғашқы минуттарда 3 мыңнан астам адам онлайн өтінім тапсырып үлгерді. Былтыр «Наурыз» және «Отау» бағдарламалары арқылы 10 мыңнан астам несие берілді.

Қарыздың жалпы сомасы 250 млрд теңгеден асты. Биыл құжат қай уақытқа дейін қабылданады? Бағдарлама несімен тиімді?

Нұрқанат Қанапия, тілші:

- Бастысы – несиенің үстемеақысы төмен, жарнасы аз. «Наурыз» бағдарламасына құжат наурыздың соңына дейін қабылданады. «Отбасы банктің» мәліметіне сүйенсек, портал іске қосылған алғашқы үш минутта тұрғындардан 3100 өтініш түскен. Бағдарламаға барлық қазақстандықтар қатыса алады.

Тек қатысушының банктегі шотында кемінде 2 млн теңге жатуға тиіс. Сондай-ақ қарыз алушының және отбасы мүшелерінің атында кейінгі 5 жылда үй болмауы шарт. Және 6 ай ресми табысы болуы қажет. Қарыздың ең жоғары мөлшері Астана мен Алматыда 36 млн теңге деңгейінде бекітілді. Ал басқа өңірлерде 30 млн теңгеге дейін несие беріледі.

Ләззат ибрагимова, «Отбасы банк» АҚ басқарма төрағасы:

- «Наурыз» бағдарламасын қаржыландыру үшін «Отбасы банк» алғаш рет жалпы сомасы 209,9 млрд теңгеге әлеуметтік облигациялар шығарды. Түскен қаражат қолжетімді шарттармен несиелендіруге бағытталды. 3560 кезекте тұрған азамат 7% төмендетілген мөлшерлемемен несие алып, баспаналы болды. Бұлар – І және ІІ топтағы мүгедектер, көпбалалы және толық емес отбасылар, мүмкіндігі шектеулі балаларды тәрбиелеп отырған отбасылар, «жетім балалар» санаты бойынша тұрғын үй кезегінде тұрған қазақстандықтар, бюджеттік ұйымдардың қызметкерлері мен әскери қызметшілер.

Бағдарлама шарттары:

Шоттағы жинақ – ₸2 млн

5 жыл атында үй болмауы

6 ай ресми табысы

Астана, Алматы – ₸36 млн

Басқа өңірлер – ₸30 млн

Елімізде құрылыс қарқыны артады

Несие 19 жылға дейін беріледі. Алғашқы жарна 10%-тен 20%-ке дейін барады. Бұл жерде үйдің жағдайына байланысты. Сондай-ақ әлеуметтік осал топтарға несие 7%-пен берілсе, басқа азаматтарға 9%-т3к үстемеақымен есептеледі.

Қазір платформада 20 мыңнан астам пәтер ұсынылып отыр. Жалпы кейінгі жылдары үй құрылыс қарқындап келеді. Былтыр 19 млн шаршы метрге жақын баспана салынды. Алдағы уақытта құрылыс қарқынын күшейту көзделіп отыр. Яғни, 2029 жылға қарай құрылыс көлемін 111 млн шаршы метрге жеткізу керек.

ҚР Өнеркәсіп және құрылыс министрлігі:

- Саладағы көрсеткіштерге қосымша қолдау құралдарының арқасында қол жеткізілді. «Самұрық-Қазына» қоры арқылы 17,3 мың пәтер сатып алуға 272 млрд теңге көлемінде қаражат бөлінді. Және «Науры» ипотекалық бағдарламасы іске қосылды. Биыл да құрылыс қарқынын бәсеңдетпеу – басты міндет. Тұрғын үй құрылысын арттыруға күш салынады. Бұл жоспардың шеңберінде «Наурыз» ипотекалық бағдарламасын жалғастыру, несиелік, жалға берілетін тұрғын үйлерді салу және сатып алу, жаңа аумақтарды инженерлік-коммуникациялық инфрақұрылыммен қамтамасыз ету көзделіп отыр.

Бағдарлама шарттары

Несие мерзімі – 19 жыл

Әрленген үй жарнасы – 10%

Әрленбеген немесе бұрын салынған үй жарнасы – 20%

Әлеуметтік осал санаттарға – 7%

Барлық санаттарға – 9%

Құрылыс материалдары өндірісіне ₸180 млрд инвестиция тартылды

Құрылыста отандық материалды қолдануға көңіл бөлініп отыр. Былтыр 1 млрд 300 млн теңгенің құрылыс бұйымы өндірілді. 2023 жылмен салыстырғанда 7%-ке жуық өсім бар. Бұл жерде негізінен ескерткіш жасайтын тас, минералды мақта және керамикалық кірпіш өндірісі ұлғайып отыр.

Сондай-ақ былтыр 276 млн доллардың тауары экспортталды. Өсім 12%-ке жуықтады. негізгі тауарлар қатарында цемент, арматура, керамикалық заттар бар. Импорт та 9%-ке жуық ұлғайды. Отандық құрылыс компаниялары 1 млрд 300 млн доллардың дүниесін шетелден сатып алды.

Құрылыс бұйымдары өндірісі

Барлығы – ₸1,3 млрд

Өсім – 6,9%

Ескерткішке арналған тас – 24,8%

Минералды мақта – 22,4%

Керамикалық кірпіш – 7,7%

Құрылыс материалдары

Экспорт – $276,3 млн

Өсім – 11,8%

Импорт – $1,3 млрд

Өсім – 8,8%

«QazIndustry» АҚ баспасөз қызметі:

- Былтыр салаға салынған инвестиция көлемі 180 млрд теңгеге жетті. Соның нәтижесінде Алматы облысында жылу оқшаулағыш материалдар шығаратын зауыт, Жамбыл облысында цемент зауыты, Шымкентте керамикалық плиткалар жасайтын кәсіпорын іске қосылып, басқа да өңірлерде бірнеше жоба жүзеге асты. Өндіріс көлемінің тұрақты өсуіне «Энергетика және коммуналдық секторды жаңғырту» ұлттық жобасы, сондай-ақ 2029 жылға дейін 111 млн шаршы метр тұрғын үйді пайдалануға беру жоспары оң ықпал етіп отыр.

Өндіріс көлемінің елеулі бөлігі Астана қаласына тиесілі. Яғни, бас қалада өнімнің 13,5%-і өндірілді. Бұдан кейін 9%-тік үлеспен Қарағанды тұр. Ал алдыңғы үштікті Алматы облысы түйіндейді.

Өңірлер үлесі

Астана – 13,5%

Қарағанды облысы – 9,3%

Алматы облысы – 9,1%