0:00:00

Жаңалықтарды Telegram арнамыздан оқыңыз!

Павлодар облысына қарасты Аққулы ауданында республикада баламасы жоқ әмбебап құтқару бөлімшесі ашылды. Ерекшелігі сол — бұл жерде төтенше жағдайлар қызметі, жедел-құтқару жасағы, өрт сөндірушілер, апаттар медицинасы бірлесіп жұмыс істейді. Жаңа нысанда тілшіміз болды.

Аққулыдағы әмбебап құтқару бөлімшесі Павлодар мен Абай облысы шекарасының нақ ортасында тұр. Яғни, екі өңір жолаушыларының қауіпсіздігін қамтамасыз етеді. Одан бөлек «Ертіс орманы» және «Семей орманы» резерваты бар. Бұл жерде құтқарушы, өрт сөндіруші және дәрігер бірлесіп жұмыс істейді.Апат болған жерге бір мезгілде барады.

Сәкен Әріпбаев, Республикалық апаттар медицинасы орталығының басшысы:

Мысалға, медицина мамандары адамға көмек көрсетсе, ол жерде қысылып қалған және өте күрделі жол көлік оқиғасы болған кезде құтқарушылар арнайы құтқару аппараттарымен көмектеседі.

Мемлекет меншігіндегі бұл нысан талай жыл бос тұрды. Жөндеу жұмыстары жүргізіліп, заманауи керек жабдықтар сатып алынды. Тәулік бойғы кезекшілікке келген қызметкерлер осында қонады. Ас үй, жуынатын бөлме, демалыс орны мен арнайы жаттығуға арналған спортзалы, тіпті тікұшақ алаңы да бар. Ең бастысы құтқарушы мамандар жеке қауіпсіздігіне қажетті құралдармен қамтамасыз етілді.

Аслан Ботабаев, Өрт сөндіруді ұйымдастыру басқармасы басшысының орынбасары:

Жауынгерлік есепке түскен кезде әрқайсысына бір-бір аппарат бекітілген. Өзінің аппаратын тексеріп, жауынгерлік есеп қояды. Осының арқасында барлық жауынгерлік жұмыс өрт сөндіру кезінде орындалады.

Бұл — былтыр басталған еліміздегі құтқару қызметтері жүйесін жаңғырту бағдарламасының жемісі. Себебі соңғы жылдары апатты оқиғалар жиілеп барады. Мұның бір себебі — еліміздегі климаттық жағдайдың өзеруі. Өткен жылы құтқарушыларға 10 мыңнан аса шақырту түскен.

Шыңғыс Әрінов, ҚР Төтенше жағдайлар министрі:

Күре жолда тұрған осындай біздің бөлімшеміз жоғары деңгейдегі стандартқа сай деп айтуға болады. Біздің мақсатымыз — ТЖ министрлігінің «Ауыл құтқарушылары» бағдарламасы бар. Сол бағдарламаға сәйкес барлық депо Астана, Алматы сияқты жағдайда болуы керек. Ауылдың, шалғай ауылдардың деполарын сондай деңгейге жеткізуіміз керек.

Бұл — зардап шеккендерге жылдам көмек көрсету ғана емес, төтенше жағдайлардың салдарын жоюға да мүмкіндік береді.

Болат Аманбаев