Атырау облысы Махамбет ауданында тауарлы балық фермасы салынып жатыр.

Шаруашылық жылына 85 тонна балық етін өндіріп 15 млн бекіре шабағын өсіре алады. Бұл аудандағы ірі инвестициялық жобалардың алғашқысы. Жалпы, облыста 2024-2029 жылдарға арналған ұлттық инвестициялық бағдарлама аясында 35 жоба жүзеге асады. Нәтижесінде 4600 жұмыс орны ашылады деген жоспар бар.

«Жайықтың жағасына орын тепкен балық фермасының құрылысы 80 пайызға аяқталды. Фермада жылына 85 тонна сибас балығы мен 15 млн дана бағалы бекіре тұқымдастары өсіріледі. Голландық технологияға негізделген кәсіпорын толықтай автоматтандырылған. Жасанды интелектіге негізделген жүйе өнімділікке пайдалы»,- дейді мамандар.

Мұса Сұлтанғалиев, шаруашылық жетекшісі:

- Бұл соңғы технология. Мына жерде шабақтар өседі. Осында жасанды интеллектіні қондырайын деп жатырмыз. Себебі балықтың жағдайына мониторинг жасауға қолайлы. Жағдайы қалай, аш па, тоқ па, соны экраннан бақылап отырамыз.

Ауданда жүзеге асқан инвестициялық жобалардың нәтижесінде тұрғындар тұрақты жұмыс тапты. Бірыңғай ауылшаруашылығымен айналысатын аудан үшін үлкен жетістік. Қазір іске қосылған 4 жоба бойынша, 100-ге жуық адам еңбекпен қамтылды.

Қасымхан Ұзақбайұлы, аудандық кәсіпкерлік және ауыл шаруашылығы бөлімінің бас маманы:

- Біздің ауданда бірнеше инвестициялық жоба іске асып жатыр. Ол құс фабрикасы және жылыжай комплексі болып табылады. Қазіргі уақытта 20 адам қамтылып отырса, болашақта олар 4 гектардан 16 га-ға үлкейгенде 60 адамды жұмыспен қамтимыз деп отыр.

Былтыр 2024-2029 жылдарға арналған ұлттық инвестициялық жобалар пулы аясында өңірде 35 ірі жобаны іске асыру жоспарланған болатын. Жобалардан 4 600-дей жұмыс орны ашылады деп күтілуде Оның ішінде 8 жоба ауылшаруашылығы саласына қатысты.

Авторлары: Арыстанбек Кенже, Айбек Байзақов