Қазақстан мен Франция археологтарының серіктестігі жаңа деңгейге көтерілді. Әлкей Марғұлан атындағы Археология институты Францияның Адам палеонтологиясы институтымен өзара ынтымақтастық туралы меморандумға қол қойды.

Сондай-ақ Сорбонна университетімен және Францияның жетекші зертханасымен де әріптестік жөнінде келісім жасалды. Тараптар бірлескен зерттеу жобаларын жүргізуге, тәжірибе алмасуға және преВентивті археологияны дамытуға уағдаласты. Құжаттар Парижде өткен халықаралық конференцияның қорытындысы ретінде қабылданды. Іс-шараға Франция ғылыми ұйымдары мен университеттерінің өкілдері және екі елдің жетекші археологтары қатысты.

Ақан Оңғарұлы, Ә.Х. Марғұлан атындағы Археология институтының бас директоры:

- Мақсатымыз әріптестермен Қазақстанның археология жетістіктерін және бірлесе жұмыс істеу перспективаларын талқылау. Соның нәтижесінде қазіргі таңда 5 бағыт бойынша жұмыс істеуге нақты келісіп, сол конференцияның резолюциясын қабылдадық. Бірінші бұл тас дәуірі бойынша мамандар даярлап, жұмыс істеу және маман алмасу мәселесі, яғни Ә.Х. Марғұлан атындағы археология институтымен Францияның барлық университеттері, ғылыми орталықтары, лабораториялармен жұмыс істеу.

Анна Эшассо, Франциядағы Адам палеонтологиясы институтының бас директоры:

- 1910 жылы құрылған Адам палеонтологиясы институты Азияның қоныстану мәселелерін зерттейді. Бұл бағытта әлі де зерттелмеген дүние көп. Қазақстан осы бойынша маңызды жаңалықтар ашуға әлеуеті жоғары елдердің бірі. Сондықтан біз үшін қазақстандық әріптестерімізбен осындай ғылыми байланыстар орнату өте маңызды.