Қазақстанда 4 384 адам ағза алмастыру кезегінде тұр. Әсіресе бүйрек ауыстыруды қажет ететіндер көп.

Бүгінде 3890 адам, оның ішінде 90 бала бүйрек донорына мұқтаж. 201 адам бауыр донорын күтіп жүр. Оның 21-і бала. Тағы 143 азаматқа жүрек трансплантациясы қажет. Былтыр елде 86 донор анықталғанымен, тек алтауының ағза мүшелерін науқасқа ауыстырып салуға жарады. Осылайша, былтыр 23 трансплантация жүргізілді. Биыл 131 донор табылған, оның тек 10-ы ғана өзгелердің өмірін сақтап қалды. Нәтижесінде ағза алмастырудың 42 операциясы жүргізілді. Жалпы соңғы бес жылда елде 1 200-ден астам трансплантация жүргізілген. Оның 90 пайызында науқастардың туыстары донор болуға келіскен. Өйткені ел тұрғындары әлі де мәйіттік донорлыққа күмәнмен қарайды. Бұған көбіне діни наным-сенім мен қоғамдағы жаңсақ пікірлер кедергі келтіретін көрінеді.

Елбек Хожамуратов, ҚМДБ Шариғат және пәтуа бөлімінің маманы

- Шариғат рұқсат берген нәрсеге бұл аманатқа қиянат болып есептелмейді. Яғни тірі адамнан тірі адамға болсын немесе қайтыс болайын деп жатқан адамның қайтыс болғаннан кейін өзінің ағзасын беру шариғатта рұқсат берілген. Сондықтан ҚМДБ ғұламалар кеңесі бірнеше жыл бұрын ағза ауыстыру үкіміне қатысты пәтуа шығарған болатын. Бұл діни ресми құжат болып есептелінеді.

Назгүл Жангелдина, Транспланттау қызметін үйлестіру жөніндегі республикалық орталық директорының м. а:

- Мидың семуін нақтылау үшін клиникалық және инструменталды тесттер бірнеше қайтара жүргізіледі. Содан кейін ғана барып дәрігерлік консилиум шақырылып, мидың семгені расталады. Мәйіттік донорлықты жүргізуге 80-100 маман жұмылдырылады. Сондай-ақ көшеде бақилық болған адамды донорлыққа алып кетеді деген алып-қашпа әңгімелер бар. Бұл жалған. Мұндайда адамның жеке тұлғасы анықталмайынша, мәйіттік донорлық туралы сөз мүлде қозғалмайды. Мәйіттік донор ретінде біз тек жансақтау бөлімінде жатқан адамды қарастыра аламыз, мәйітханадан донор ешқашан алдырылмайды.