0:00:00

Жаңалықтарды Telegram арнамыздан оқыңыз!

Жансұлтан — Орал қаласының тумасы. Ол «Болашақ» бағдарламасымен Англияның Уорик университетінде магистратурада білім алған. Кейін ауыл мектебінде жұмыс істеп, қазір Шотландияның Абердин университетінде докторантурада оқуын жалғастырып жатыр.

Жансұлтан Нұрмұханов, Абердин университетінің студенті:

Қазақтар шетелге шыққанда дәстүрді қаттырақ ұстанады деп айта аламын. Себебі олар бір жағынан өз туған жерін сағынатын себептен осы олар әр мерекені тойлауға тырысады.

Әселжан Сарбалина Атыраудың қызы. Оксфорд университетінің грантын ұтып алып, осында докторантурада оқып жүр. Қосымша жергілікті клиникада дәрігер болып та жұмыс істейді. Амал мерекесінде ол отандастарын құттықтап қоймай, ұлттық салт-дәстүрлерімізді шетелдіктер алдында да паш етіп жүр.

Әселжан Сарбалина, Оксфорд университенің студенті:

Олардың барлығы сұрады. Бұл не, бұл қандай мереке? Басынан бастап бәрін түсіндіріп жатқанымда олар сондай бар екен ғой таң қалды.

Шетелдіктердің Көрісу күніне деген қызығушылығы ерекше. Сан алуан мәдениеттер тоғысқан Лондон қаласының тұрғындары Ұлы дала елінің салт-дәстүріне тәнті болды.

Ребекка Сюнанджори, Лондон тұрғыны:

Қыстан аман шыққан адамдар саулық сұрасатын жақсы мереке екен. Келесі көктемде қазақтарды кездестіре қалсам, құшақтасып, көрісетін боламын.

Адам Вейг, Лондон тұрғыны:

Менің Қазақстан туралы хабарым болғанымен бұл дәстүр туралы білмеппін. Мен үшін өте қызық тәжірибе болды.

Тұманды Альбионда жылқы етін сатуға тыйым салынған. Қазы-қарта болса да жоқ. Бірақ соған қарамастан дастарқанына бауырсағын, елден алдырған құрт-ірімшігін қойып, наурыз көжесін пісіретін қазақ көп. Олар әрбір қонағына жылы шырай танытып, қарсы алады ерекше ілтипат көрсетеді және әлбетте «Бір жасың құтты болсын», деп тілек айтады.

Марина Бекенова