Белгілі отандық футболшы Асхат Тағыбергеннің жұбайы Махаббат Тағыберген Instagram-дағы парақшасында жазба жариялады. Онда ол халықтан жолдасының отандық футбол үшін жасаған еңбегін ұмытпауды сұрады, деп хабарлайды KAZ.NUR.KZ.

BAQ.KZ басылымының жазуынша, бұған дейін Шымкент әкімі Ғабит Сыздықбеков қала тұрғындарымен кездесу кезінде Асхат Тағыбергеннің ойынына қатысты пікір білдірген еді. Ол футболшы дұрыс ойнай алмай жүргенін тілге тиек еткен. Сонымен қатар Сыздықбеков футболшының жалақысын жария етіп, оның айлығы 20 миллион теңге екенін мәлімдеген. Көп ұзамай Тағыбергеннің жұбайы желіде жзаба жариялап, күйеуіне қолдау көрсеткен.

"Әйелі ретінде мен Асхаттың футболға қосқан үлесімен және әділ ойнап, бар күшін салатын қағидаларымен мақтанамын. Ешкіммен айтысып, салғыласпаймын, бірақ әділетсіздікке үнсіз қалу да дұрыс емес. Әр жанкүйерді құрметтеймін, бірақ бір маусыммен ғана баға бермей, жақсы сәттерді ұмытпайық. Қолдауларыныз үшін алғысым шексіз!", — деп жазған ол.

Оқырмандардың көбі Асхат Тағыбергеннін отандық футболдағы рөлі туралы өз пікірін жарыса жазып жатыр.

"Айлығы 20 млн болса да, барлығы да заң аясында келісім шарт негізінде белгіленген", "Асхаттың Данияға соққан голы ешқашан ұмытылмайды", "Асхат керек ойыншы", — деп жазып жатыр оқырмандар.

Еске салсақ, 2023 жылы 26 наурызда Еуро-2024 іріктеу кезеңі аясында Қазақстан құрамасы Даниядан басым түскен. Қазақстан командасы Данияны өз алаңында 3:2 есебімен ұтты. Бұл матчта гол соққандар қатарында Асхат Тағыберген де болды. Тіптен оның голын Еуропа футбол қауымдастықтарының одағы (УЕФА) 2024 жылғы Еуропа чемпионатына іріктеу кезеңінің екінші айналымындағы үздік гол деп таныды.