Ақтөбе облысында онға жуық ауылдың жолын су басып, қатынасты қиындатты, деп хабарлайды 24kz.

Еріген қар суы өткелдерді бұзып кеткен. Атап айтқанда, Ойыл, Темір, Мұғалжар, Алға мен Қобда ауданындағы елді мекендер зардап шегіп отыр. Мәселен облыс орталығын Темір ауданымен байланыстыратын Ақтөбе – Болгарка – Шұбарқұдық, Ақсай – Бірлік автожолының 154-шақырымында жолды су шайып кеткен. Алға ауданына қарасты Қарабұлақ ауылдық округіндегі Амангелді ауылының кіреберіс жолы жарамсыз боп қалды. Ал, Қандыағаш – Ембі – Шалқар – Ырғыз автожолында барлық көлік түрлерінің қозғалысына шектеу қойылды. Мұнда да мұз бетімен аққан қызылсу арнасынан тасып, жолды басқан. Аталған ауылдарға балама бағыттар бар. Дегенмен, қазір Ойыл ауданында жағдай күрделі.

Нұржау Тұрғамбеков, Ойыл ауданы әкімінің орынбасары:

- Бүгінгі таңда мына Құбасай ауылы, Қараой ауылы, Ақшатау ауылы, Қарасу ауылдарында автомобиль жолдарында су басып жол қатынасы үзілген болатын. Ауылдардың қазіргі жағдайда ахуалы тұрақты. Азық-түлік, дәрі-дәрмек барлығы қамтамасыз етілген.

Аудан орталығына да тек су көлігімен қатынауға мүмкіндік бар. Жолаушыларды құтқарушылар қайықпен тасымалдап жүр. Бұдан бөлек, өңірге Қызылорда облысының Төтенше жағдайлар департаментінің 31 сарбазы көмекке келген. Ал, Қорғаныс министрлігіне қарасты инженерлік-саперлік бригаданың әскери қызметшілері Ойыл өзенінің үстіне уақытша өткел салуға кірісті.

Дастан Кәрімов, №58012 әскери бөлімі командирінің орынбасары:

- Платформада инженерлік техникалар, яғни, КрАЗ-255Б екі дана, суда жүру транспортирі бір дана, БМК сүйреткіш моторлы катер екі дана, сонымен қатар десанттық және көпірлерді құру мақсатында 11 әскери қызметші жіберілді.