Жамбыл облысында әскерилер ұлттық спортты дәріптеуде, деп хабарлайды 24kz.

Жуалы ауданында орналасқан таулы-егерлік полкінде жас сарбаздар атқа мінеді.

Елдегі бірегей әскери бөлімнің жауынгерлері Наурыз мерекесін де ұлттық дәстүрлерге сай атап өтті.

Оңтүстік өңірлік қолбасшылығына қарасты Жуалы ауданындағы таулы-егерлік полкінің құрылғанына 25 жыл толып отыр. Бұл әскери бөлімнің басты міндеті – техника мен адам аяғы баса бермейтін таулы аймақтарды күзету және әскери жаттығулар жүргізу. Бүгінде бөлім құрамында арнайы мақсатқа бейімделген 80 жылқы бар, олардың барлығы соғыс жағдайына толықтай дайындалған.

Алмас Отыншынов, Таулы-егерлік полктің командирі:

- Әскери аттарды 3-5 жас аралығында аламыз. Олар ротада 15 жыл бойы қызмет етеді. Осы аралықта мініске үйретіліп, жауынгерлік оқу жаттығуға да машықтаймыз. Жалпы жылқыларды екі мақсатта қолданамыз. Бір тобын әскерилер мінсе, қалғаны қару жарақ сынды жүктерді тасиды. Үйретілген бір ат 300 келіге дейін көтере алады.

Ұлыстың ұлы күніне орай әскери полигонда ұлттық спорт түрлері ұлықталды. Ат құлағында ойнаған жауынгерлер көкпар тартып, қыз қуып, теңге алды. Білектілері аударыспақта күш сынасты. Жалпы ұлттық ойын тек көңіл көтеру емес, атты әскерді шыңдайтын нағыз спорт. «Сондықтан жаттығуда да жиі қолданамыз», — дейді рота командирі.

Елнұр Пернебек, Таулы-егерлік полктің рота командирі:

- Аударыспақ жаңағы атпен ойнайтын, теңге ілу, қыз қуу көкпар секілді ойындарды біз осы далалық оқу-жаттығуларына шыққанда соларға әзірлік жасап, соларды ойнап үйреніп, оларды көрмеген, қалада өскен неше түрлі балалар бар. Ұмытпау мақсатында біз күніне болмаса да, айына бір, аптасына бір рет соларды машықтап, сонымен айналысып отырамыз.

Жаттығудан соң жауынгерлер журналистерге жылқыға мінуден шеберлік сағатын өтті.

Ақтоты Жаңабай, журналист:

- Әскерилердің тек өздерінің әскери міндетін өтеп қана қоймай, ұлттық спортты ұлықтайтынын өз көзімізбен көрдік. Сонымен қатар өзіміз де осы сәтті пайдаланып, жылқыға мініп үйрендік. Мен ары қарай да осы жылқыға мінуді жалғастыра берсем бе деймін.

Ұлттық ойынды дәріптеген әскерилер атыс алаңына Наурыз мерекесін алып келгендей әсер қалдырды. Іс-шара соңында қорғаныс салысындағы қыз-келіншектер бауырсақ пісіріп, жиылғандарға үлестірді.

Авторлары: Мерей Бает, Бақытжан Бапаев, Елдар Байділдә