Мемлекет басшысы Қасым-Жомарт Тоқаев бүгін Төтенше жағдайлар министрі Шыңғыс Әріновті қабылдады, деп хабарлайды Ақордаға сілтеме жасаған NUR.KZ.

Президент ведомствоның атқарған қызметі, салада жүргізілген реформалар және төтенше жағдайдың алдын алу, салдарын жою жөніндегі есепті тыңдады.

Қасым-Жомарт Тоқаевқа жеделдікті қамтамасыз ету үшін бірыңғай аумақтық орган құрылғаны және басқарудың артық тармақтары қысқартылғаны туралы баяндалды. Командалық басқару жаңғыртылды, ведомство жұмысына цифрлық технологиялар енгізілді.

Атап айтқанда, дрондардың көмегімен онлайн бейнебақылау жүргізу және ведомствоаралық сервистермен интеграция іске қосылды. Аталған жаңашылдықтарды қолдану арқылы оқыс оқиғалардың саны – 2,8 пайызға, кісі өлімі – 10,2 пайызға, жарақат алғандардың саны 8,1 пайызға азайды.

Министр жүзеге асырылған инфрақұрылымдық жобалар туралы, соның ішінде Астана қаласында өрт сөндіру депосы мен Атырауда құтқару бекеті салынғанын айтты. Былтыр 14 жаңа өрт сөндіру депосы пайдалануға берілген.

Шыңғыс Әрінов құтқарушылардың жаңа киім үлгісі бекітілгенін, материалдық-техникалық базаны жаңғырту жұмыстары жалғасып жатқанын, әуе кемелері сатып алынғанын жеткізді. Елді мекендердегі қауіпсіздікті қамтамасыз ету үшін "Ауыл құтқарушылары" ведомстволық бағдарламасы қолға алынды.

Ықтимал табиғи апаттарға дайындықты пысықтау үшін Алматыда "Алатау" жедел мақсаттағы оңтүстік базасы құрылды. Азаматтарды уақытша орналастыруға арналған үш орын белгіленді. Каспий теңізінің қазақстандық секторында "Теңіз жасағы" бөлімшесі іске қосылды. Бұл құрылым оқыс оқиғаға тап болған адамдар мен кемелерді құтқаруға маманданған. Төтенше жағдай аймағына гуманитарлық жүкті тасымалдаумен айналысатын "Айбат" арнаулы мақсаттағы жасағы құрылды. Барлық өңірде әуе құрылымдарын жасақтау жұмыстары жалғасып жатыр.

Мемлекет басшысына су тасқыны жөнінде ақпарат берілді. Министрдің айтуынша, республика аумағындағы жағдай тұрақты. Қауіп төнген жағдайда тұрғындарды эвакуациялау үшін күштер мен техникалар сақадай сай. Сегіз өңірдегі жағдай бақылауда. Ресей және Қырғызстанмен тұрақты түрде ақпарат алмасу жұмыстары жүргізіліп жатыр.

Президент су тасқынына қарсы шараларға баса назар аудару, алдын ала ескерту жүйесін жаңғырту және төтенше жағдайдың салдарын жою бойынша бұған дейін берілген тапсырмалардың орындалуын жалғастыру жөнінде міндет жүктеді.