Театр – өнер айнасы. Мемлекет басшысы Ұлттық құрылтайда театр өнеріне қызығушылық артқанын атап өтті.

Алайда, аймақтағы өнер ордаларының келешегіне алаңдаушылық білдірді. Әсіресе, рухани орда Семейдегі театрлардың тар ғимаратты бөлісуі – үлкен мәселе.

Мерей Мұратханқызы, тілші:

- Ғабит Мүсірепов театрды көздің жасындай мөлдір, нағыз хас сұлу өнерге балады. Расында, сахнадағы кейіпкерін барынша ашып, оның рухани жай-күйін, жан тебіренісін көрерменге жеткізу оңай емес. Ал театрда шыңдалған әртіс өнердің сан саласында өзін жоғалтпайды. Олардың арасында жастардың көп болуы Мемлекет басшысын тәнті етті.

Қасым-Жомарт Тоқаев, ҚР Республикасының Президенті:

- Қазір Қазақстанда 46 аймақтық театр бар. Алайда оның көпшілігінің жай-күйі мәз емес. Мысалы, Семейде бір ғимаратта үш бірдей театр сығылысып отыр. Әсіресе, аймақтарда театрларды дамытуға баса назар аудару керек. Халқымыздың мәдени әралуандығын сақтауға мүмкіндік беретін орыс және басқа да ұлттық театрларды қолдау маңызды.

Театрдың шығыны көп. Жалақыны айтпағанда, қойылымдарға арналған декорация, костюмдер, музыкалық сүйемелдеу, премьера, гастрольдік сапарлар. Тізе беруге болады. Ескі әрі тар ғимараттың өзі әртістің еркін көсілуіне кедергі болуы мүмкін.

Мерей Мұратханқызы, тілші:

- Сан жылдық тарихы бар Қаллеки театрының жаңа ғимаратта жаңа тынысы ашылғаны белгілі. Қазір ел аумағында 60-тан астам театр бар. Мемлекет басшысы Ұлттық құрылтайда сөйлеген сөзінде: «Осынау рухани ордамызға демеушілік қажет», - деді. Себебі өнер баршамызға ортақ құндылық.

Астанадағы Қалибек Қуанышбаев атындағы ұлттық музыкалық театрды мемлекет қаржыландырады. Бірақ демеушілермен де байланыс орнатылған. Соның арқасында ел ішін аралап, өңірдегі көрерменді қуантуға мүмкіндік туған.

Ербол Қабылбеков, Қ.Қуанышбаев атындағы Қазақ ұлттық музыкалық драма театрының директоры:

- Соңғы кездері жаңадан құрылған облыстардың бәрін аралауға тырысып жатырмыз. Ұлытау облысында болдық, Абай облысында болдық. Сондықтан қазіргі таңда бір-бірімізбен тәжірибе алмасу жұмыстары міндетті түрде жалғасады. Өйткені ұлттық театрда қазіргі таңда 460-қа жуық адам жасайды жұмысты. Сондықтан біз жалпы республикадағы ең үлкен театрлардың біріміз. Сондықтан көбісі бізге қарап бой түзейді.

Қазір Қаллеки театрында премьера жүріп жатыр. «Махаббатым сен» деп аталады. Қойылым алғашқы күні-ақ көрермен қошеметіне бөленді. Бұл театр өнерінің өміршеңдігін көрсетсе керек.

Авторлары: Мерей Мұратханқызы, Марат Дихамбаев