Қазақстан 2026 жылғы әлем чемпионатына іріктеу турнирінің алғашқы матчында жеңіліп қалды.

Әли Әлиев шәкірттері Уэльс құрамасына 1:3 есебімен есе жіберді. Ойын Уэльстегі «Кардифф Сити» стадионында өтті. Алғашқы голды 9-минутта қарсыластың жартылай қорғаушысы Дэниел Жеймс салды. Қорғаушылардың қателігін ұтымды пайдаланған ол Заруцкийдің қақпасын дәл көздеді. Қазақстан футболшылары 32-минутта таразы басын теңестірді. Асхат Тағыберген пенальтиден қарымта қайтарды. Алайда бұдан кейін Уэльс ойыншылары тағы екі гол соқты. Қазақстан келесі кездесуін Лихтенштейн құрамасымен өткізеді. Ойын 25 наурыз күні Вадуц қаласында өтеді.

Әли Әлиев, футболдан Қазақстан құрамасының бас бапкері:

- Біз қарсыласты жан-жақты зерттедік. Соған сәйкес ойын тактикасын құрдық. Қарсылас жаппай шабуылға шыққан кезде допты қағып әкетіп, жылдам ойыншыларымыздың арқасында қарымта шабуылды жедел ұйымдастыруға арқа сүйедік. Біз стандарттық жағдайларға қатысты көп жаттығу жасадық. Бірақ өкінішке қарай бұрыштамадан екі допты өткізіп алдық. Осы ойында ең кемі 1 ұпай еншілейміз деп ойлап едік.

Ғалымжан Кенжебек, футболдан ұлттық құрама ойыншысы:

- Уэльс енді мықты қарсылас, біріншіден. Екіншіден, біздің командамызбен тырыстық. Сырттан бәріне байқалды. Бапкердің айтқанын істедік. Келесі ойындарда нәтиже болады деген үміттеміз, Құдай қаласа. Бас бапкердің айтқаны бойынша 2-1 кезде шықтым. Шабуылға көмектесу керек болды. Лихтенштейнге қарсы ойында тек жеңіс. Басқа мақсат жоқ.