Жылына 8 мыңнан астам әйел босанатын облыстық перинаталдық орталық тарихында мұндай оқиға алғаш рет болды, деп хабарлайды 24kz.

Мнаура Мұқтарова бүгін нәрестесімен бірге перзентханадан шықты.

Шекесі торсықтай ұл дүйсенбі күні дүниеге келді. Салмағы 3 келі 68 грамм, бойы 57 см. Нәресте мен анасы аман-есен отбасымен қауышты.

Андрей Гайдай, облыстық перинаталдық орталық директорының орынбасары:

- Ана мен нәрестенінің денсаулығы жақсы. 5-6 баласын дүниеге әкеліп жатқан аналарды жиі көреміз. Бірақ 11 рет құрсақ көтеру деген сирек кездеседі. Бұдан бөлек, жылына 2-3 әйел үшем босанса, 120-ға жуық ана егізді дүниеге әкеледі.

Дүние есігін ашқан сәбиді перзентханадан шығарып алуға бауырлары мен туыстары жиналды. Жүк көлігі жүргізушісі болып еңбек ететін отағасы Айдын Рамазанов іссапарда екен.

Айсана Құдайберген, М.Мұқтарованың қызы:

- Ағалары бар егіз. Олардың аты Хан-Темір мен Хан-Тәңір. Соған қарап Хан-Төре деп қойдық. Мен өзім қуаныштымын.

7 ұл мен 4 қыз баланы дүниеге әкелген Мнаура Мұқтарова 39 жаста. Алтын құрсақ ананың тұла бойы тұңғышы 17 жасқа жетсе, Хан-Темір мен Хан-Тәңірі наурыздың 13-інде 2-ге толады.

Мнаура Мұқтарова, көпбалалы ана:

- Тұрмысқа шыққан жылы 11 балам бар деп армандаған жоқпын. 5-6 балам болса шүкір дейтінмін. 3 ұл, 3 қызым болса деп армандап едім. Енді қазіргі таңда жолдасымның өзі, отағасымыз үйіміздің «сен деген үлкен енеңе жетіп отырсың, арманыңнан да асып кеттің»,- де жатыр, шүкірмін. Тіл-көзден аман болсын деймін.

Он бірінші баласы дүниеге келген отбасы үшін биылғы жыл қуанышты жаңалықпен басталған. Баспана кезегінде тұрған батыр анаға 4 бөлмелі пәтер кілті табысталды. Отағасы іссапардан оралған соң жаңа үйде шілдехана тойы болады.

Авторлары: Мансұр Есқожин, Болатбек Молдағалиев, Айбек Даутов