Аймақ басшысы Ербол Қарашөкеев жер сілкінісі болған Меркі және Тұрар Рысқұлов аудандарында болып, төтенше жағдайлар жөніндегі жедел штабтың отырысын өткізіп, бүлінген нысандарды аралады.

Арнайы комиссия облыс әкімінің тапсырмасы бойынша келтірілген шығынды анықтау жұмыстарын жүргізеді. Оның құрамына Төтенше жағдайлар министрлігі Сейсмологиялық байқау және зерттеулер ұлттық ғылыми орталығының өкілдері кіреді.

"Меркі аудандық орталық ауруханасының, Меркі ауылдық округіндегі "Балдәурен" балабақшасының ғимараттарында және Талдыбұлақ ауылындағы тұрғын үйдің асханасында қабырға жарықшақ анықталды. Тұрар Рысқұлов ауданы Абай ауылындағы тұрғын үйдің, Жаңатұрмыс ауылындағы — 6 баспананың, ауылдық мектептің, Қарақыстақ ауылдық округінің Каменка ауылындағы мәдениет үйінің қабырғаларында жарықшақ пайда болған", — делінген әкімдік таратқан хабарламада.

Аудандардағы нысандарды мамандар аралап, ахуалды көзбен көрді. Меркі ауданында айналма жолдарға 55 адам, 33 техника, Тұрар Рысқұлов ауданында 65 адам, 40 техника жұмылдырылды.

"КАЖсервис" ЖШС облыстық филиалының қызметкерлері (25 адам, 19 техника) Меркі және Тұрар Рысқұлов аудандарындағы республикалық маңызы бар автомобиль жолдарының (5 көлік айырығы, 2 теміржол өткелі және 3 көпір) жай-күйін тексеріліп жатыр. 45 елді мекен зерттелді.

Қырғыз Республикасының Төтенше жағдайлар министрлігімен өзара іс-қимыл кезекші бөлім арқылы ұйымдастырылды.

Шоң-Қақпа және Орто-Тоқай су қоймалары қалыпты жұмыс істеп тұр.

Полиция мен ТЖД қоғамдық қауіпсіздікті қамтамасыз ету бойынша шаралар қабылдауда.

8 (7262)513575 нөмірі бойынша "жедел желі" іске қосылған.