Қазақстан Республикасы Мәдениет және ақпарат министрлігінің Архив, құжаттама және кітап ісі комитеті геральдикалық жұмыс басқармасы мен «Геральдикалық зерттеулер орталығы» РММ-нің ұйымдастыруымен «Мемлекеттік рәміздер мен ведомстволық және оларға теңестірілген өзге де наградалар геральдикасы мәселелері» тақырыбында республикалық семинар өтті, деп жазады Egemen.kz.

Екі күндік семинарға еліміздің барлық өңірлерінен мемлекеттік органдардың, сондай-ақ Қазақстан Республикасы Ішкі істер министрлігі мен Сауда және интеграция министрлігінің өкілдері, Мәжіліс депутаттары мен қоғам қайраткерлері қатысты.

Іс-шараның басты мақсаты – мемлекеттік рәміздер мен ведомстволық наградалар геральдикасын талқылау, оларды насихаттау, ұлттық стандарттар мен заң талаптарының сақталуын қамтамасыз ету, сондай-ақ адал еңбек иелерін марапаттау рәсімін біріздендіру.

Айта кетейік, Мемлекет басшысы Ұлттық құрылтайда геральдика мәселесіне бірнеше мәрте тоқталып өткен болатын. Мәселен, Түркістанда өткен Ұлттық құрылтайда өңірлік нышандарды жүйелеу мәселесін көтерсе, таяуда Бурабайда өткен жиында ведомстволық марапаттарды ретке келтіруді тапсырды.

Жиын барысында өңірлік нышандарды заң талаптарына сәйкес бекіту және оларды біріздендіру, мемлекеттік рәміздерге қатысты құқық бұзушылықтарды дер кезінде анықтап, тиісті шаралар қабылдау, мемлекеттік рәміздерді пайдалану тәртібі мен ұлттық стандарттардың сақталуы, сондай-ақ Мемлекеттік рәміздер күнін мерекелеу мәселелері талқыланды.

Атап айтқанда, семинардың алғашқы күнінде Архив, құжаттама және кітап ісі комитеті геральдикалық жұмыс басқармасының басшысы Гүлдана Аргенова Президент тапсырмасына сәйкес өңірлік нышандарды біріздендіру жөнінде атқаралып жатқан жұмыстарды баяндады.

Ал Ішкі істер министрлігі Тыл департаментінің бас маманы Аида Баялиева Қазақстан Республикасының мемлекеттік рәміздеріне қатысты құқық бұзушылықтарды уақтылы анықтау және шара қолдану тақырыбында сөз қозғады.

Сондай-ақ, ҚР Сауда және интеграция министрлігінің Стандарттау және тауарлардың шыққан елдері басқармасының басшысы Қазбек Нұрбек Қазақстан Республикасының Мемлекеттік Туы мен Мемлекеттік Елтаңбасы) ұлттық стандарттарының сақталуы мен қолданылуы жөнінде айтып берді.

Семинарға қатысушылар аталған мәселелерге қатысты сұрақтары мен ой-пікірлерін ортаға салып, кеңірек талқылады.

Семинардың екінші күні Қазақстан Республикасы Парламенті Мәжілісінің Заңнама және сот-құқықтық реформа комитетінің мүшесі Абзал Құспан мемлекеттік рәміздерге қатысты жауапкершілікті күшейту мәселесін көтеріп, заңнамалық өзгерістер енгізуге қатысты ойларын ортаға салды.

Қазақстан Республикасының Мемлекеттік елтаңбасы авторы Жандарбек Мәлібеков мемлекеттік рәміздердің мәні мен маңызына тоқталып, өңірлік нышандарды біріздендіру туралы бастамаға қолдау білдірді.

Сонымен қатар тұңғыш рәмізтанушы Ербол Шаймерденовтың жары, ұстаз Күләш Қайыржанқызы сөз сөйлеп, мемлекеттік рәміздерді әзірлеу кезіндегі қиындықтар мен естеліктер жөнінде ой бөлісті.

Іс-шара соңында семинарға қатысушыларға сертификаттар мен естелік сыйлықтар табысталды.