Сербияда өткен бокстан әйелдер арасындағы әлем чемпионатында әлем чемпионы атанған боксшылар мәлімдеме жасады.

Бұл туралы Caravan.kz медиа порталы хабарлайды.

Назым Қызайбай, Аида Балқыбекова, Аида Әбікеева «Қызық Times» бағдарламасына сұхбат беріп, спорттық мансаптарына қатысты жоспарларымен бөлісті.

Олар жүргізушілердің «Күйеуге шыққаннан кейін боксты жалғастырасыздар ма» деген сұрағына жауап берді.

Аида Әбікеева бұл сұраққа «жоқ, жалғастырмаймын» деп қысқа қайырды. Сондай-ақ, Назым Қызайбай да өз ойымен бөлісті.

«Әркім өзі біледі ғой. Бізде қазір құрамада күйеуге шығып, бес балалы ана болса да спорттан кетпей, жақында ғана Азия чемпионатының қола жүлдегері болған Айгерім Сәттібаева есімде боксшы бар. Сондықтан адамға байланысты. Кейбіреулері бокссыз өмір сүре алмайды. Бірақ, өзім күйеуге шыққаннан кейін қайтып спортқа оралмау керек деп ойлаймын. Құрамада бала-шағасы бар қыздар бар. Олар үнемі оқу-жаттығу жиынында жүреді. Баланың қалай өскенін көрмейсің дегендей мәселелер болады. Балаға ең бірінші тәрбие беретін анасы болғаннан кейін, күйеуге шыққаннан кейін бокспен айналысуға өзім қарсымын», — дейді ол.

50 кг салмақ дәрежесінде әлем чемпионы атанған Алуа Балқыбекова да Назым Қызайбайдың пікіріне қосылатынын айтты.

«Назым дұрыс айтады. Әйел адамға өте қиын. Егер, күйеуі қолдап жатса, балалы болмағанға дейін болады. Ал балалы болғаннан кейін қиын болатын сияқты. Жаңа Назым айтқан Әйгерім Сәттібаева әпкемізге ата-енесі көмектесіп отыр. Оның күйеуі де олимпиада қатысушысы. Қазір әйелін қолдап, әрдайым қасында жүреді», — дейді ол.