Қазақстан Сауда және интеграция министрлігі соңғы айда елде азық-түлік бағасының өсуіне қатысты пікір білдірді. Министрлік ресми мәлімдеме жасады, деп хабарлайды KAZ.NUR.KZ.

Министрлік мәлімдемесіне сай, кей азық-түліктің бағасы өссе, кейбірінің бағасы тұрақты.

"2025 жылғы 27 мамырдағы деректер бойынша алдыңғы аптамен салыстырғанда қырыққабат 3,4%-ға, жұмыртқа 0,7%-ға, қарақұмық, макарон және күнбағыс майы 0,1-0,2%-ға арзандаған. Нан мен күріштің бағасы тұрақты болып, өзгеріссіз қалды. Сонымен бірге кейбір өнімдердің бағасы өсті. Соңғы аптада сәбіз 4,2%-ға, картоп 2,8%-ға, пияз 2,5%-ға, тұз 1,6%-ға, сүзбе 0,8%-ға, сүт пен қант 0,3%-ға, май, сиыр еті мен тауық еті 0,2%-ға, ұн мен айран 0,1%-ға қымбаттады. 2025 жылдың басынан бері әлеуметтік маңызы бар азық-түлік тауарлары бағасының индексі 6,8%-ға өсті", — дей келе, ведомство бағаны тұрақтандыру мақсатында қандай шаралар қолға алынып жатқанына тоқталған.

"Бағаларды тұрақтандыру және азық-түлік қауіпсіздігін қамтамасыз ету үшін Сауда және интеграция министрлігі салалық және жергілікті органдармен бірлесе отырып жедел шаралар қабылдап жатыр. Атап айтқанда, Қытайдан, Пәкістаннан және Өзбекстаннан ерте пісетін көкөністер жеткізу жұмысы ұйымдастырылды. Қазіргі уақытта Астанада министрліктің қолдауымен "ҚТЖ Экспресс" АҚ жеткізген 50 рефрижератор контейнер картоп түсіріліп жатыр. Жалпы ішкі нарықты өніммен толықтыру мақсатында қосымша 45 мың тонна картоп, 4 мың тонна қырыққабат импортталды", — делінген хабарламада.

Сондай-ақ ведомство ішкі нарықта маусымаралық кезеңдегі тасымал жанданғанын атап өтті. Мәселен, Түркістан облысында қырыққабат жинау жалғасып, ерте піскен картоп жинау басталған. Ерте піскен картопты егін алқабынан сатып алу бағасы 280-350 теңге аралығында.

"Сонымен қатар Еуразиялық экономикалық комиссия Кеңесі 2025 жылғы 30 маусымға дейін 150 мың тоннаға дейін картопты баж салығынсыз импорттау механизмін енгізді. Бұл шара маусымдық баға шарықтауын төмендетуге бағытталған.

Азық-түлік пен мал шаруашылығы шикізатының кейбір түрлерін экспорттауға уақытша шектеулер қойылған. Мәселен, 28 қаңтардан бастап картоп экспортына (6 айға), 10 сәуірден бастап ірі және ұсақ қара малдың аналық басын экспорттауға (6 айға), 25 сәуірден бастап ірі қара бұқашықтарын экспорттауға (3 айға) шектеу енгізілді. Бұл шаралар ішкі нарықта тұрақты өнім ұсынысын қолдауға ықпал етеді", — деп жазылған министрлік сайтында.