Наразылықты жаншу – штат егемендігіне ауыр нұқсан.

Лос-Анджелес мэрі қаладағы мигранттарды тексеру шараларын тоқтатуға шақырып отыр, деп жазады inbusiness.kz сайты Рейтерске сілтеме жасап.

Карен Басстың айтуынша, көші-қон полициясының рейдтері жақсылыққа апармайды. Оның салдары штаттың экономикасына да кері ықпал етеді.

"Өйткені Лос-Анджелестегі негізгі жұмыс күші – осы мигранттар" – дейді қала мэрі.

Ал cенаторлар президент Трамптың Калифорния штатына Ұлттық гвардияны жергілікті билікпен ақылдаспай жібергенін айыптап жатыр.

Олар: "Ақ үй басшысы Лос-Анджелестегі ахуалды өзі ушықтырып отыр", – деп санайды.

Айта кетейік, наразылық шараларынан кейін қалада тәртіпсіздік күшейіп, АҚШ президенті Дональд Трамп Калифорния губернаторы Гэвин Ньюсомды елде бүлік туындауына себепкер деп айыптап, тіпті оны қамауға алуға дейін баруы мүмкін екенін мәлімдеген болатын. Трамп Ньюсомды "өте қабілетсіз" деп атады. Губернатор Ньюсом Трампқа ашық хат жолдап, Ұлттық гвардияны алып кетуді талап етті. Оның айтуынша, бұл - штаттың егемендігіне ауыр нұқсан. Лос-Анджелес мэрі Карен Басс та мұны қолдады. Федералдық биліктің көші-қон полициясы 60 адамды қамауда ұстап отыр.