Шымкентте көктемнің ажарын аша түскен қызғалдақтың 1 млн 250 мың түп тұқымы егілді.

Хош иісті гүлдер орталық көшелер мен қоғамдық саябақтарда ай соңына қарай жайқалып гүлдейді. Қазір жер жібіп, өсімдіктер бойын тіктей бастады. Сонымен қатар қаланың көркін арттыру мақсатында егілген сары, қызыл және ақ түсті көпжылдық раушан гүлінің 220 мың көшеті Англия мен Франциядан әкелінген. Қалалық жайлы ортаны дамыту басқармасының мәліметінше, биыл көгал аумағы екі есеге ұлғайтылады. Оны күтіп ұстау бес ауданның коммуналдық қызметіне жүктелген. Ал мереке қарсаңында гүлдер жәрмеңкесі ұйымдастырылып, тұрғындарға қызғалдақ, шафран, шырайгүл және барқытгүл ұсынылды.

Әуесбек Опабек, Қалалық жайлы ортаны дамыту басқармасының бөлім басшысы:

- Биыл 400 мың шаршы метр аумақты көгалдандыру, гүлдендіру мақсатында жұмыстарды басталып кетті. Жалпы адам басына шаққанда көгалдандыру аймағы 10 шаршы метрді құрауы қажет. Енді біздің қаламызда жаңадан саябақ құрылысын салу жұмыстары атқарылуда. Сол саябақтар мен гүлзарлардың құрылысы, одан бөлек газон аумағының есебі бойынша 10 шаршы метрге жеткізу жоспарланды.