Қала тұрғындары бір аптада 122 келі жарамсыз дәрілік заттарды өткізген.

Алматы қаласында тұрғындардың жарамсыз дәрі-дәрмектерді қауіпсіз және экологиялық жолмен тапсыруына мүмкіндік беретін арнайы қабылдау пунктілері жұмысын бастады. Маусымнан бастап 36 қалалық емханада арнайы контейнерлер орнатылып, қолданылмаған, жартылай пайдаланылған немесе сақтау мерзімі өткен дәрілік заттар жинала бастады.

Жобаны Алматы қаласы әкімдігі, Eco Network экологиялық ұйымы және халықаралық фармацевтикалық өндіруші Stada компаниясы бірлесіп жүзеге асыруда.

Eco Network ұйымының негізін қалаушы Евгений Мұхамеджановтың айтуынша, бұл бастама қоршаған ортаны қорғаудағы маңызды қадам.

"Қазақстанда дәрілік заттарды қауіпсіз түрде жою жүйесі әлі де жолға қойылмаған. Көп жағдайда адамдар дәрілерді қоқысқа тастайды немесе кәрізге жібереді, ал бұл заттар жер асты суларына түсіп, экожүйеге ұзақмерзімді зиян келтіреді. Біздің мақсат – әр адамға дәріні дұрыс тастау арқылы табиғатты қорғауға үлес қосуға мүмкіндік беру", – деді ол.

Сондай-ақ, эколог пилоттық кезеңде небәрі бір аптаның ішінде Алматыда 122 келі жарамсыз дәрі жиналғанын атап өтті. Оның сөзінше, Қазақстанның басқа аймақтарында да сұраныс жоғары.

"Дәрілерді дұрыс қолданбау – тек адам денсаулығына емес, табиғатқа да қауіп. Біз бұл жобаны тек корпоративтік стратегия емес, қоғам алдындағы жауапкершілік ретінде қолдаймыз", – деді Stada Kazakhstan компаниясының бас директоры Наталья Гарипова.

Қабылдау пунктілерінде тек таблеткалар, капсулалар, жақпалар, кремдер, ампулалар, флакондар, сироптар сияқты дәрілік заттар ғана қабылданады. Ал инелер, шприцтер, қанмен жанасқан қалдықтар арнайы медициналық ұйымдарда жойылуы тиіс. Кәдеге жарату процесі – толықтай бақыланатын, бейнежазба арқылы тіркелетін және арнайы заманауи технологиялармен (жоғары температурада жағу, плазмалық өңдеу) жүзеге асырылады.