Жыл сайын шетелден 10 мың адам Қазақстанға емделу үшін арнайы келеді. Себебі, отандық дәрігерлер күрделі операцияларды сәтті жасап жүр, деп хабарлайды 24kz.

Тіпті жүрекке ашық ота жасау отандық дәрігерлер үшін үйреншікті жағдайға айналды. Абзал жандар ана құрсағындағы шарананы да емдеуді меңгерген. Қазақ медицинасының осы және басқа да жетістіктерін бүгін Мемлекет басшысы Ақордада жіпке тізді. Қасым-Жомарт Тоқаев медицина саласы қызметкерлерін кәсіби мерекесімен құттықтап, табанды еңбек лайықты бағалануы тиіс екенін айтты. Гиппократ антын берген кәсби мамандарды мемлекеттік наградамен марапаттады.

Бекзат Аманов, тілші:

- Ақхалаттылар алғаш рет Ақорда төріне көтерілді. Мерекелік мезіретті Мемлекет басшысынан алатын дәрігерлер мәз-мейрам. Президент те: «Абзал жандарды басты резиденцияда жинап, жиын өткізудің маңызын ерекше», - дейді. Медицина мамандарының табанды еңбегі ескерусіз қалмайтынын жеткізіп, сөз басын ризашылықпен бастады.

Қасым-Жомарт Тоқаев, Қазақстан Республикасының Президенті:

- Дәрігерлер ота кезінде, аурухана палатасында күн сайын ерлік жасайды десек, артық болмайды. Жедел жәрдем көлігінде адам өміріне араша түсетін сәттер болады. Сондықтан сіздер, құрметті медицина қызметкерлері, бейбіт күннің батырлары деген атқа лайықсыздар. Мен барша медицина мамандарына зор ризашылығымды білдіремін.

Қазақ дәрігерлері қай кезеңде де ұлт мүддесін бәрінен биік қойған. Олар халқымыздың азаттығы үшін де, саулығы үшін де аянбай күресті. Тарихтың қатпарында бастау алған сол күрес қазір де жалғасын табуда. Президент мұны жоғары бағалайды. Бүгінде елде 380 мыңға жуық медицина маманы жұмыс істейді. Солардың ерен еңбегінің арқасында халқымыздың орташа өмір сүру ұзақтығы 75 жастан асты. Ана мен бала өлімі 12%-тен азайды. Бес жылда 800-ге жуық денсаулық сақтау нысаны салынды.

Қасым-Жомарт Тоқаев, Қазақстан Республикасының Президенті:

- Бұл жұмыс тоқтамайды, мемлекет алдағы уақытта да инфрақұрылымды дамыта береді. Ұлт саулығын жақсарту алғашқы медициналық көмектен басталады. Елімізде ауылдық жердегі медицина жүйесін жаңғыртуға арналған ұлттық жоба жүзеге асырылып жатыр. Бүгінде 469 ғимарат бой көтерді. Жыл соңына дейін тағы 186 нысан салынады.

Алтын қолды ақхалаттылар да көбейіп келеді. Қазір отандық мамандар күрделі ота жасаудан алдына жан салмайды. Бір ғана мысал. Жыл сайын 45 мемлекеттен шамамен 10 мың адам Қазақстанға емделу үшін арнайы келеді екен. Өйткені отандық дәрігерлердің кәсіби шеберлігі айтарлықтай артқан. Мәселен, елде жүрекке жыл сайын мыңдаған ашық операция жасалады. Жетістіктер мұнымен шектелмейді.

Қасым-Жомарт Тоқаев, Қазақстан Республикасының Президенті:

- Елімізде органдарды трансплантациялау ісі жоспарлы түрде дамып келеді. Жуырда жүрек ауыстыруға арналған жүзінші ота сәтті өтті. Биыл алғаш рет бір мезетте үш адамға үш донордың бүйрегін тоғыспалы трансплантация тәсілімен салды. Өздеріне сәйкес келетін органдарды алу үшін пациенттер бір-біріне донор болды. Мұндай күрделі операциялар дүниежүзінде алты елде ғана жасалады.

Нақты мысал келтірсек... 2023 жылы Президент Ана мен бала орталығына барған еді. Сол кезде бүйрек трансплантациясы бойынша кезегін күтіп жатқан жеткіншектің арман-тілегін тыңдады. Сонда Қасым-Жомарт Тоқаев балғын аруға армандар орындалатынын айтып, жұбатқан. Арада жарты жыл өткеннен кейін Әнелге ота жасалды. Қазір ол білім алып, алаңсыз балалық балдәуренін өткізіп жүр.

Шолпан Алтынова, Ана мен бала орталығының нефролог-дәрігері:

- Дәрігерлер онкологиялық ауруларды емдеуге сәуле терапиясының озық әдістерін қолданып жатыр. Былтырдан бері елде фетальді медицина дами бастады. Яғни, біздің мамандар ана құрсағындағы шаранаға операция жасай алады. Нәтижесінде құрсақта халі сал болған қаншама бала дүниеге дені сау болып келді. Енді мемлекет фармацевтикалық өнеркәсіпті дамытуға айрықша назар аударады.

Қасым-Жомарт Тоқаев, Қазақстан Республикасының Президенті:

- Ірі халықаралық инвесторларды тарта отырып, стратегиялық сипат алған бұл саланы дамытуға күш салу маңызды. Алдағы уақытта медицина ғылымының әлеуетін толықтай игеру керек. Ол үшін қазірдің өзінде берік негіз бар. Ғалымдарымыз онкология, трансплантология, неонатология, генетика, биомедицина салаларында тың жаңалықтар ашты. Қан ауруларын емдеуге отандық препараттар қолданылып жатыр. Жасанды интеллект сырқаттарды анықтау мен емдеудің көкжиегін кеңейтеді.

Міне, салада ауыз толтырып айтарлықтай жетістіктер бар. Осы ретте Қасым-Жомарт Тоқаев медицина мамандарын әлеуметтік тұрғыдан қолдап, мәртебесін көтеру де негізгі міндет екенін айтты. Соңғы 5 жылда ақхалаттылардың жалақысы өсіп, студенттердің шәкіртақысы көбейді. Салаға бөлінетін қаржы 2,6 трлн теңгеге жетті. Бұл көрсеткіш алда ұлғая береді. Енді Қасым-Жомарт Тоқаев халқымыз абзал жандарға әрдайым құрмет көрсетуге тиіс деді.

Қасым-Жомарт Тоқаев, Қазақстан Республикасының Президенті:

- Дәрігерді халықтың қамқоршысы деуге болады. Өкінішке қарай, қоғамда дәрігердің жұмысына кедергі жасап, тіпті, қоқан-лоқы көрсететін адамдар әлі де бар. Медицина қызметкерінің қауіпсіздігіне қатер төндіретін заңсыз әрекетке жол беруге болмайды. Қоғамдық тәртіпті бұзатын осындай адамдар міндетті түрде заң аясында жауапкершілікке тартылады.

Жиын соңында Президент отандық медицинаны дамытуға қосқан елеулі үлесі және азаматтардың денсаулығын сақтаудағы қажырлы еңбегі үшін сала мамандарын марапаттады. Жоғарыдай айтқандай, медицина мамандары Ақордаға алғаш рет келіп отыр. Мұны дәрігерлер жоғары бағалап, Мемлекет басшысына алғысын жаудырды.

Медицина мамандарының мәртебесін көтеру жайлы бастама жемісін беріп жатыр. Дәрігерлер: «Мұны іс жүзінде сезініп отырмыз», — дейді. Бүгінгі жиында мерекелік мезіретте Президент қолынан аға буын да, жас мамандар да марапат алды. Мұны ақхалаттылар жоғары бағалады.

Бүгінгі марапат лайықты мамандардың еңбегі ескерусіз қалмайтынын көрсетті. Президент саланы қолдау күшейетінін жеткізді. Мұны негізгі бағыт ретінде атады. Нағыз маман үшін кәсіби мереке қарсаңындағы ең үлкен сый осы болса керек.

Авторы: Бекзат Аманов, ПТРК