Алматылық "Қайраттың" 16 жастағы шабуылшысы Дастан Сатпаев Transfermarkt порталының жаңартылған деректері бойынша Қазақстан Премьер-Лигасындағы ең қымбат ойыншы болып танылды, деп хабарлайды Skifnews.kz ақпарат порталы.

Оның трансферлік құны бірден 1,3 миллион еуроға өсіп, қазір 1,8 миллион еуроға (шамамен 770 миллион теңге) бағаланып отыр.

Сатпаевтың құнының күрт өсуі оны ҚПЛ ойыншылары арасындағы көшбасшы етті. Екінші орында – командадағы әріптесі, жартылай қорғаушы Валерий Громыко. Оның құны 200 мың еуроға өсіп, 1,2 миллион еуроны құрады. Ал үздік үштікті Георгий Зария мен Егор Сорокин аяқтайды – екеуінің де құны 900 мың еуроға тең.

Айта кетейік, Сатпаев биылғы маусымда Қазақстан Премьер лигасында 13 ойында 8 гол соғып, 4 нәтижелі пас берген. Әзірге отандасымыз ҚПЛ-да үздік сұрмергендер тізімінде көш басында.