Мемлекет басшысы Қасым-Жомарт Тоқаев БАҚ саласы қызметкерлерін кәсіби мерекесімен құттықтап, бірқатар маманды мемлекеттік наградалармен марапаттады.

Президент "Ұлттық медиа – халықтың үні, ал журналист жасампаздық жаршысы" деп, қоғам мен биліктің арасында көпір орната білген баспасөз өкілдеріне ризашылығын білдірді. Елдегі реформаларды жіпке тізіп, сан саладағы серпіліс жайлы баяндады. Ең бастысы, ұлттың болмысы өзгере бастағанын ерекше атап өтті. Бұған медиа майталмандары елеулі үлес қосты. Қасым-Жомарт Тоқаев күрделі геосаяси ахуалға да тоқталып, әлем жаңа дәуірге қадам басқанын мәлімдеді. Президенттің айтуынша, алмағайып, бұлыңғыр заманда, жүрналистерге зор жауапкершілік жүктеледі.

Қасым-Жомарт Тоқаев, Қазақстан Республикасының Президенті:

- Қазіргі ақпарат тасқынында сенімді дерек, дәйекті талдау ұсынудың мән-мағынасы арта түсті. Журналистің ағартушылық миссиясы алдыңғы қатарға шықты. Кез келген ақпаратты мұқият елеп-екшеп, жұртқа дұрыс жол көрсету өте маңызды. Бұл ретте сіздерді ақпарат әлемінің темірқазығы деуге болады. Мен журналистеріміздің әр мәліметті ұлт мүддесі тұрғысынан саралай аларына сенемін. Өйткені өзім көп оқимын, сіздер жазған мақалалармен, ой-пікірлермен таныспын.

Қасым-Жомарт Тоқаев жиынға ақпарат саласының ардагерлері арнайы шақырылғанына назар аударды. Ақпарат саласын дамытуға зор үлес қосқаны үшін алғыс айтып, адал еңбек лайықты бағалануға тиіс екенін мәлімдеді. Отырыс соңында бір топ азаматты мемлекеттік наградалармен марапаттады. Сондай-ақ БАҚ саласындағы Президент сыйлығы мен гранттарын табыстады. Оған қоса бірқатар шығармашылық ұжымға алғыс жариялады. Оның қатарында «Хабар» Агенттігі» акционерлік қоғамының ұжымы да бар.