Халықаралық Kaspersky Lab компаниясы былтыр жүргізген сауалнама нәтижесінде еліміздегі балалардың 88 пайызында жеке смартфон бары анықталды. Олардың 28 пайызы барлық бос уақытын гаджетке жұмсайды. Мәжіліс депутаты Жарқынбек Амантайұлы балалардың телефонға тәуелділігі азайтып, физикалық белсенділігін ширатудың амалдарын айтты, деп жазады Egemen.kz.

Бүгінде жасөспірімдердің 74 пайызы — TikTok-ты, 59 пайызы – YouTube-ты, 57 пайызы – Instagram-ның тұрақты қолданушысы. Ал әрбір бесінші ата-ана баласының әлеуметтік желіде қандай хабар жариялайтынынан бейхабар. Ата-аналардың 62%-ы балаларының экран алдындағы уақытын бақылау үшін ешқандай арнайы бағдарлама мен шектеу қолданбайтынын алға тартқан Мәжіліс депутаты желі жастар арасындағы депрессияны күшейтінін айтып, сауал жолдады.

«Желіге желіккендер психологиялық, физикалық, әлеуметтік қиындыққа тап келуде. Мысалы, Гонконг Қытай университетінің зерттеулері бойынша, интернетке тәуелді жасөспірімдер арасында психологиялық ауытқуларға тап болу көрсеткіші 2,5 есе жоғары. Депрессияға шалдығу ықтималдығы 3 есе көп болады екен. Бүгінде әлеуметтік желіні шектеп жатқан елдер аз емес. Олардың қатарына Қытай, Оңтүстік Корея, Франция, АҚШ, Австралия және тағы басқа дамыған елдерді жатқызуға болады», деп мысал келтірген Жарқынбек Амантайұлы мәселені заңнамалық негізде шешуді ұсынды.

«Бірінші, еліміздің Оқу-ағарту, Мәдениет және ақпарат және Цифрлық даму, инновациялар және аэроғарыш өнеркәсібі министрліктері ведомствааралық топ құрып, әлеуметтік желілердің өскелең ұрпаққа тигізетін зиянын жан-жақты сараптап, саралап, арнайы заң жобасын әзірлеуі қажет. Екінші, әлеуметтік желілер мен онлайн ойындарды пайдалану бойынша жас шектеулерін енгізу, сондай-ақ, кәмелетке толмағандарға гаджеттерді пайдалану уақытын белгілеу бойынша тиісті ұсыныс әзірленуі керек. Үшінші, ата-аналар үшін балаларының интернет әлеміндегі іс-әрекеттерін, өткізген уақытын қадағалауға мүмкіндік беретін бірыңғай мемлекеттік бақылау жүйесін құруды ұсынамын», деді депутат.

Мәжілісмен мұндай тәжірибені Қытай және Франция үкіметі қолданысқа енгізгенін атап өтті. Ал Оңтүстік Корея мен Канада ондаған сауықтыру орталығын ашып, заманауи гаджеттерге тәуелділерді сауықтыруды қолға алғанын тілге тиек етіп, мұның алдын алуға шақырды.