Түркістанда республикалық «Күй құдіреті» байқауы өтіп жатыр, деп хабарлайды 24kz.

Ұлттық домбыра күніне арналған күй жарысына еліміздің түкпір-түкпірінен келген дәулескер күйшілер қатысып, өзара бақ сынауда.

Жандос Жұмабек, тілші:

- Республикалық «Күй құдіреті» байқауы биыл Түркістанда осымен үшінші мәрте ұйымдастырылып отыр. Биылғы байқауға еліміздің әр аймағынан 25 күйші қатысып, өз өнерлерін ортаға салуда. Мәселен, байқаудың талаптары мен шарттарына алғашқы кезеңде күйшілер Түркістанның төл перзенттері, дарынды күйшілер Сүгір Әлиұлы мен Төлеген Момбековтың шығармаларын орындап, өзара бақ сынайды. Ал екінші кезеңде күйшілер оркестрдің сүйемелдеуімен жеке домбырамен өнер көрсетуі керек. Бұл қатысушылардың орындаушылық шеберлігімен қатар, сахна мәдениетін, күйді терең сезіну қабілетін бағалайтын тартысты кезеңдер болмақ.

Айта кетейік, жалпы байқаудың мақсаты – қазақ руханияты мен мәдениетінің баға жетпес байлығы, ұлы даланың төл өнері күйді ұлықтап, дарынды орындаушыларға жол ашу, жас буынды дәстүрлі өнерге баулу әрі олардың шығармашылық әлеуетін дамыту. Байқау жеңімпаздары бүгін кешке анықталады. Жүзден жүйрік шыққандары бағалы сыйлықтарымен марапатталады.