Павлодарда Халықаралық жастар күні мен Жұмысшы мамандықтар жылына арналған республикалық жастар форумы өтіп жатыр.

Еліміздің түкпір-түкпірінен жиналған белсенді жастар форум аясында ең алдымен Ұлы Абайдың ескерткішіне гүл қойып, тағзым етті. Форум жұмысына әртүрлі салада табысты еңбек етіп жүрген, елдің әлеуметтік-экономикалық дамуына үлес қосып жүрген жас мамандар қатысуда. Арасында ерлік көрсеткен жастар, өнердің биік шыңын бағындырған дарын иелері мен өңірлік жастар бастамаларын дамыту орталықтарының жетекшілері де бар. Айта кетейік, елімізде алғаш болып «Жастар саясаты басқармасы», «Жасыл ел» бағдарламасы және волонтёрлік ұйымының қозғалысы дәл осы Павлодар облысында құрылған болатын.

Қайрат Қамбаров, ҚР Мәдениет және ақпарат министрлігі жастар және отбасы істері комитетінің төрағасы:

- Әрбір форумның нәтижесі бүкіл аумақтардан келген жастар өзара пікір алмасып, өзара әр аумақта ұйымдастырылып жатқан жобалармен бөлісу, колобарация жасау, нәтижесі сол болады. Мысалы ретінде Алматыда ұйымдастырылатын бір жақсы жобаларды Павлодарда қолдану, Павлодарда жүзеге асқан жақсы жобаларды Шығыс Қазақстан облысында қолдану.

Елдос Жұмабеков, "ҚЭЗ" алюминий цехының ауысым шебері:

- Маңызды нәрсе ол технологияда ол анод, анодты қазіргі кезде бізде 28-29 циклда ауыстырылады. Бірақ менің арманым, ол анодты жылына бір рет ауыстыру, сол кезде бізде экономикалық әсері де болады және де адам өзі қиналмай жұмыс істей алады.

Жібек Сайдахан, Шымкент қ. жастар ресурстық орталығының маманы:

- Жалпы бізде Шымкент өңірінде жеке қабылдауға көбіне жастарымыз және де 14 пен 35 жас аралығындағы жастар қызмет алады. Ол жерде түрлі жағдай қарастырылған, жаңағыдай отбасылық мәселелер болсын, жасөспірімдердің арасындағы жағдайлар оның бәрі.