«Жасанды интеллект өңірлік дамуда». Қостанайда осындай атаумен аймақтық инвестициялық форум өтті, деп хабарлайды 24kz.

Алқалы жиынға ақпараттық технология саласының мамандары, атқарушы билік өкілдері мен бизнес және халықаралық ұйым өкілдері қатысты. Олар цифрлық шешімдерді түрлі салада кеңірек қолдану жөнінде өз ой-пікірлерін айтты.

Жасанды интеллект қазір өміріміздің ажырамас бөлігіне айналды. Қай салада болсын кеңінен қолданылады. Ақпараттық технологияның жетік білгірі Мағауия Ысқақовтың компаниясы енгізген инновациялық бағдарлама бүтін бір зауыттың еңбек өнімділігін 30%-ке арттырған.

Мағауия Ысқақов, «Еуразиялық Одақ BTS» ЖШС бас директоры:

- Тап қазір онлайн режимде Ақтөбе ферроқорытпа зауытының бүкіл пештерінің қалай жұмыс істеп тұрғандығын көрсетеді. Тап қазір қай пеш жұмыс істеп тұр. Қай пеш жұмыс істемей тұр. Қандай қуатпен жұмыс істеп тұр. Бұл жерге бірнеше мыңдаған сигналдар автоматты түрде келіп түседі.

Мемлекет басшысы алдағы бес жылда елді цифрлы мемлекетке және бүкіл Еуразия үшін хабқа айналдыру міндетін қойды. Президенттің бастамасымен Орталық Азиядағы ең қуатты компьютер Қазақстанда іске қосылды. Осы саладағы жетістіктерімізді Еуропа да мойындап отыр және жасанды интеллектіні бірлесіп дамытуға мүдделі екендерін білдірді.

Алешко Симкич, Қазақстандағы Еуроодақ елшісі

- Ауыл шаруашылығына жасанды интеллектіні енгізуде Еуропа елдерінің тәжірибесі мол. Астық өнімділігін арттыру, суды тиімді пайдаланудың озық технологиясын кеңірек қолданысқа енгізу керек. Бұл тұрғыда, әсіресе, Қостанай облысымен екіжақты тиімді байланыс орнатудың маңызы зор.

Қостанай облысында озық технологиялар қарқынды түрде енгізілуде. Былтыр ақылды қалалар рейтингінде Қостанай Астана, Алматы, Қарағандыдан кейін төртінші орынды иеленді. Облыс басшысы өз сөзінде инновация және цифрландыру саласында көшбасшы өңірге айналу мақсаты тұрғанын айтты.

Құмар Ақсақалов, облыс әкімі:

- Біздің бүгінгі кездесуіміз үлкен жолдың бастауы. Мемлекет басшысы атап өткендей, экономиканы түбегейлі жаңғырту және еңбек өнімділігін арттыру үшін экономиканың нақты секторына жасанды интеллектіні еңгізуді қолға алу қажет. Біз жасанды интеллектіні пайдаланы отырып, қуатты, замануи және өркендеген өңір құрамыз деген сенімдеміз.

Инвестфорумға қатысушылар Қостанайда стартаптар мен инвесторларға қолайлы жағдай қалыптасқанын, сондықтан цифрлық шешімдерді белсенді түрде әлі де дамытуға алғышарттар бар екенін атап өтті.

Авторлары: Мағауия Қалиев, Ермек Мұхамедияров