Испания жасанды интеллект технологияларын реттеу бойынша маңызды қадам жасады.

Ел үкіметі биыл арнайы заң жобасын бекітіп, оны Парламент мақұлдауына ұсынды. Құжатқа сәйкес, жасанды ақыл-ой арқылы жасалған контент — мәтін, сурет немесе бейне — айқын белгіленуі тиіс. Егер компания мұндай мазмұнды ашық түрде көрсетпесе, оған 35 млн еуроға дейін айыппұл салынады. Бұл бастама қоғамды жалған ақпараттан әсіресе, Deepfake сияқты қауіпті технологиялардан қорғауды көздейді.

Deepfake — жасанды интеллект көмегімен адамның түрін, дауысын немесе қимылын шынайы етіп өзгертіп көрсететін технология. Ол көбіне бейне мен аудио контентте қолданылады. Бір қарағанда нағыз адам сөйлеп тұрғандай көрінгенімен, бұл шындыққа жанаспайды. Deepfake технологиясы адамның ар-намысына нұқсан келтіретін жалған видеолар жасауда жиі қолданылады. Бұл кибербуллинг пен онлайн зорлық-зомбылықтың жаңа түріне айналған қауіпті құбылыс. Бұдан былай Испания аумағындағы компаниялар AI арқылы жасалған контентті белгілемей жарияласа немесе таратса, заңға сәйкес жауапкершілікке тартылады.

Нурия Оливер, Аликанте жасанды интеллект институтының ғылыми директоры:

- Испания әлеуметтік, саяси және ақпараттық қауіптерге қарсы алғашқы нақты қадам жасады. Биыл жасанды интеллект технологияларын реттеу бойынша заң жобасын қабылдады. Қазіргі таңда медиа саласында жаңалық немесе репортаждарды қызықты ету үшін AI арқылы бейнелер жасалса да, олардың жасанды екені көрсетілмейді. Жаңа заң бойынша мұндай технологияны қолданғанын ашық жарияламаған бірлестіктерге енді шара қолданылады.

Испания жасанды интеллект саласында тек шектеулерге емес, қолдауға да басымдық беріп отыр. Бір жыл бұрын «жасанды зерде» стратегиясы қабылданды. Оған қазынадан 1,5 млрд еуро бөлінді. Қаражат инфрақұрылымды дамытып, көптілді AI платформаларын құру мен технологиялық зерттеулерді қолдауға бағытталды. Сонымен қатар, биыл бизнеске 155 млн еуро көлемінде субсидиялар бөлініп, стартаптар мен компанияларға AI технологияларын енгізуге, осы арқылы жаңа өнім мен қызмет түрлерін ұсынуға мүмкіндік ашты.

Пабло Гонсалес Перес, киберқауіпсіздік сарапшысы:

- Бизнеске бөлінген субсидиялар стартаптар мен компанияларға AI негізіндегі интерактивті оқыту платформаларын, өнеркәсіптік автоматтандыру жүйелерін, медициналық диагностика құралдары мен қорғаныс жобаларын дамытуға көмектеседі. Бұл бастамалар адам еңбегін жеңілдетіп, өндіріс пен қауіпсіздікті арттыра түспек.

Испанияның жаңа заң жобасы жасанды зерденің әсерін бақылауда маңызды қадам болып отыр. Мамандар ол тек технологиялық даму ғана емес, сонымен қатар қоғамның қауіпсіздігі мен этикалық нормаларын сақтауға көмектеседі дейді.

Авторлары: Аида Қыдырбай, Дмитрий Рогач