Түркістан облысында алдағы 3 жылда жалпы құны 2,5 трлн теңге болатын 111 инвестициялық жоба жүзеге асырылады. Нәтижесінде 23 мыңнан астам жаңа жұмыс орны ашылады. Бұл туралы Түркістан облысының әкімі Нұралхан Көшеровтің бастамасымен Президент Жолдауын жүзеге асыруға арналған мәжілісте айтылды. Жиынға 100-ден астам жергілікті кәсіпкер қатысып, Мемлекет басшысының тапсырмаларын іске асыру тетіктерін талқылады.

Мемлекет басшысы өз Жолдауында өңірлерде өңдеу өнеркәсібін өркендету, кәсіпкерлікке кең жол ашу, инвестиция тарту, цифрлық экономиканы ілгерілету сынды стратегиялық маңызды міндеттер қойды. Осыған орай облыс әкімі жергілікті ірі кәсіпкерлерді жинап, заманауи инновациялық жобаларды бірлесіп жүзеге асыруға шақырды.

Нұралхан Көшеров, Түркістан облысының әкімі:

- Мемлекет басшысы жолдауында айтқандай, ЖИ пен цифрлық технологияны енгізу болашақтың талабы. Сондықтан жаңа заманауи жүйелер мен ЖИ енгізу бір жағынан өнімнің сапасын арттырса, екіншіден жұмыс порцесін оңтайландырып, адам еңбегін жеңілдетеді. Ақылды өндіріс — бұл тек технология емес, бұл — тиімді басқару, үнемділік, тұрақтылық, даму. Осыған орай сіздерді өңірімізде ақылды зауыттар, цифрлы фермалар, инновациялық өндірістерді көптеп ашуға шақырамын.

Инвестиция – экономиканың қозғаушы күші. Сондықтан өңірде инвесторлармен тікелей жұмыс істейтін жаңа инвестиция басқармасы құрылды. Бұл құрылым инвесторларды сүйемелдеп, әкімшілік кедергілерді жою, жобаларды жедел іске асырумен айналысады. Жиында мал бордақылап, ет өндіретін ірі кәсіпкерлер Сырым Ертаев Президент тапсырмасына қатысты өз жобаларымен бөлісті.

Сырым Ертаев, "Nurym Group" ЖШС құрылтайшысы:

- Қазір біз Израильмен жақсы жұмыс жасағалы отырмыз. Қанша үлкен көлемде болса да дрон бәрін санап, ауырғанын анықтап береді. Диогнозын қойып беретін, телефонына смс арқылы келіп тұратын жағдайға жеткізіп жатыр. Міне бұл -ЖИ. ЖИ қолдана келе біз адами факторларды кемітуге, жұмысын жеңілдетуге болады екен. Ет, сүт саласын, олардың қалдығын тереңдетіп өңдетіп, экспортқа шығаруға, өзіміздің елді толық қамтып, жұмыс істеуге болады.

Президент жүктеген міндетті орындау мақсатында биылдың өзінде өңірде 57 жоба іске асырылып, 8 мыңнан аса жұмыс орны ашылмақ. Бүгінге дейін соның 21 жобасы іске қосылды. Аймақ басшысы бұл – өңір экономикасы үшін үлкен серпіліс екенін атап өтті.

Авторлары: Жандос Жұмабек, Ерболат Әбіш