«Ми ағыны» (brain drain) — маңызды мәселе деп саналады. Алайда керісінше үрдіс те байқалып отыр – олардың қатарында жоғары білімді мамандар да бар, олар Солтүстік Америка, Еуропа, Қытай мен Ресейді емес, саналы түрде Қазақстандағы өмірді таңдауда .

Олардың көбі өз әсерлерін әлеуметтік желілерде бөлісуде, — деп жазады Caravan.kz медиа порталы.

Мысалы, Ресейден келген көптеген эмигранттар Қазақстанда мәңгі қалуға шешім қабылдаған.

«Дәл үш жыл бұрын мен Қазақстанға көшу туралы шешім қабылдадым. Дәл осы жерден менің жаңа өмірім басталды — жаңа елде бәрін қайтадан бастауға тура келді: тұрмыс та, орта да, достар да. Бүгін мен өзімнің дұрыс таңдау жасағаныма сенімдімін және болашағымды осы елмен байланыстырғым келеді. Бірнеше айға басқа елдерге кетіп қалсам да, әр жолы осында оралғанда өз үйіме қайтып келгендей боламын. Рахмет, Қазақстан!» — деді ол.

«Мұнда қаншалықты көп өмір сүрген сайын, Алматыға деген махаббатым соншалық арта түседі. Табиғаты әсем, айналасын таулар қоршаған қала, жасыл да жайлы көшелер, әрдайым дәмді ас беретін кафелер мен мейрамханалардың атмосферасы ерекше. Қалада демалудың түр-түрі бар, ал жыл өткен сайын Алматы одан сайын көрікті де қолайлы бола түсуде», — деп қосты ол.

Оны басқа да Қазақстанға қоныс аударған ресейліктер қолдады.

«Иә, бұл рас. Шымкентте тұрған кезімде іссапармен Ташкентке барғанда өзімді біртүрлі суық сезінетінмін. Ал шекарадан қайта өткен сәтте, үйге қайтқандай жеңілдеп, терең дем алып қоятынмын. Таңғажайып ел, таңғажайып адамдар. Қазақстанға жаңа әрі жарқын өмір сыйлағаны үшін шексіз ризамын».

«Біз де Ресейден көшіп келгенімізге шамамен үш жыл болды. Белгілі себептермен. Енді бұл — біздің үйіміз, ең жайлы орын. Мұнда тамаша достар, керемет жұмыс пен мол мүмкіндік бар».

«Бұл өте жақсы, демек сіз өз орныңыздасыз. Мен де дәл осылай Астанамен байланысты сезінемін — өз орнымда екенімді білемін. Осыдан үш жыл бұрын көшіп келдім, енді Астана — менің үйім».

«Бұл – мейірімді, ашық қоғамда, бейбітшілікті бағалайтын елде өмір сүрудің тамаша мүмкіндігі! Біз де Ресейден көшіп келгенімізге үш жыл болды, бір жарым жыл бұрын осында балалы болдық. Қазір аздап қаржылық қиындықтар бар, бірақ шын айтқанда, таразының бір жағына осы қиындықтарды, ал екінші жағына Ресейдегі өмірді (өз пәтеріңде тұрып, эмиграциядағыдай мәселелермен бетпе-бет келмейтін өмірді) қойсаң да, біз бәрібір осы жерді таңдар едік. Қолымыздан келгенше осында қалуға тырысамыз. Қайта Ресейге көшу — қорқынышты түстей елестейді».

Өз тәжірибесімен шетелден оралған немесе ұқсас жағдайды бастан өткерген қазақтар да бөлісті. Олардың кейбірі жоғары жалақылы жұмыс пен орныққан өмірден өз еркімен бас тартқан.

«Канадада 7 жыл өмір сүрдім, тұрақты тұру құжатын алдым, канадалық паспортқа дейін бір-ақ жыл қалған еді. Бірақ мен Алматыға қайтып келдім. „Босқа келдің бе?“ дейтіндер бар, иә, мүмкін, өмірінде шетелде тұрмағандар үшін солай көрінер. Бірақ олардың пікіріне мән берудің қажеті жоқ. Ең бастысы — өзімді осында жайлы, бақытты сезінемін. Мұнда менің орным. Ешкіммен ақылдасудың қажеті жоқ. Бұл — сенің өмірің, оны қалай сүретініңді тек өзің шешесің».

«Мен де Оксфордты бітірген соң елге оралдым. Лондонда бірден бөлім директоры болып жұмыс істеу мүмкіндігім болды, бірақ мен осында қалдым. Еш өкінбеймін».

«Отбасыммен 2009 жылы Соль-Илецктен (Орынбор облысы) Ақтөбеге көшіп келдік. Қазақ тілін мүлде білмейтінмін. Мұнда келіп үйрендім. Ештеңеге өкінбеймін, бәрі басқаша — адамдар мейірімді, араласу оңай. Иә, Ресейден достар бар, кейде өзім барамын, олар да келеді, араласамыз, бірақ саясат тақырыбын қозғамаймыз».

«2003 жылы Омбыдан көшіп келдім — өмірімдегі ең дұрыс шешім осы болды».

«Бүкіл отбасымызбен Ставрополь өлкесінен, Нефтекум ауданынан көштік. Барлығы тамаша».

«Қызымның сыныбында Қытайдан көшіп келген бір қыз оқиды. Қазақша да, қытайша да жақсы сөйлейді. Қайда оқуға түсесің деп сұрағанда: “Осында оқимын” дейді. Өзі Қытайда туған, бірақ: “Біз үйге оралдық”, — дейді. Біздің балалар шетелде оқығысы келеді, ал басқалары — елге оралуды армандайды».

«Ата-анам Ресейде туған әрі өскен, мен де сол жақта дүниеге келдім. Үш жасымда отбасымызбен Қазақстанға көшіп келдік. Сол шешімі үшін ата-анама алғысым шексіз!»

«Өзім Семейденмін, күйеуім — Мәскеуден. 2021 жылы, бәрі басталмай тұрып көшіп келдік. Күйеуіме мұнда ұнайды, кәдімгідей «Ереке» болып кетті. Күні кеше жұмысына кию үшін заманауи шапан алғысы келетінін айтты. Азаматтықты тезірек алу үшін қандас мәртебесіне өтініш берді. Міне, осылай».

«1994 жылы әкем бүкіл отбасымызды осында көшіріп әкелді, сол үшін оған шексіз алғыс айтамын!»