Мұндай жаңа талапты ҰҚК төрағасы әрі Министрлер кабинеті төрағасының орынбасары Камчыбек Ташиев жариялады.

Қырғызстанда бұдан былай мейрамханалар, дәмханалар, түнгі клубтар мен өзге де ойын-сауық мекемелері түнгі 22:00-ден кейін жұмыс істемейді, деп жазады inbusiness.kz сайты.

Сағат 22:10-да аталған мекемелердегі электр қуаты толық ажыратылуы керек. Ол түнгі тыныштықты сақтау мәселесіне ерекше көңіл бөліп, бұл тәртіп бүкіл ел бойынша міндетті болатынын айтты.

"Тойлар да, мейрамханалар мен клубтардың жұмысы да 22:00-де аяқталуға тиіс. Адамдар түнде тынығып, таңғы 7-ге дейін тыныштық сақталуы шарт", – деп мәлімдеді Камчыбек Ташиев.

Айта кетейік, 13 қарашада Бішкек пен Ош қалаларының әкімдері дәмхана, мейрамхана және өзге де ойын-сауық мекемелерін аралап, иелерінен сағат 22:00-ден кейін электр жарығын өшіруді талап етті. Қалалық билік мұны қыс маусымындағы электр тапшылығын болдырмау және "Тыныштық сақтау туралы" заңның талаптарын орындау қажеттілігімен түсіндіріп отыр.

Ош қаласының әкімі Жеңісбек Тоқторбаев бұл ережені орындамаған мекемелерді бір ай бойы электр қуатынсыз қалдыруды тапсырды.