Ел мерейін әлемдік сахналардың төрінде үстем етіп жүрген Димаш Құдайберген көші-қон арқылы жаһанның әр түкпіріндегі адамдар шекара асып мәдениетті дамытып, білім мен шығармашылықты кең дәріптей алатынын атап өтті.

«Миграция, менің ойымша жаңа мүмкіндіктерге жол ашады. Мен түрлі елдердің сахнасында өнер көрсеткен сайын залда әлемнің сан алуан елінен келген көрермендерді көріп, олардың тағдырлары тоғысқанын сезініп жүрмін. Музыка бізді біріктіреді. Осы бірліктің ар жағында жарық пен үмітке толы адамзаттық ғұмыр жолдары жатыр. Атаулы күнге орай әрбір тағдыр үлкен хикая екенін айтқым келеді», деді Қазақстанның халық әртісі.

БҰҰ Көші-қон агенттігінің жаһандық ізгі ниет елшісі өз сөзін түйіндей келе үйінің жылуын жүрегінде сақтап, әлемге таратып жүрген әрбір адамға алғысын айтты.

Еске салайық, Халықаралық мигранттар күні БҰҰ Бас Ассамблеясының өтініші бойынша 2000 жылдан бері аталып келеді.

Қазақстанда 2030 жылға дейінгі көші-қон саясатының жаңа тұжырымдамасы әзірленді.

Айта кетейік, Димаш Құдайбергенге С.Д. Асфендияров атындағы Қазақ ұлттық медицина университетінің құрметті профессоры атағы берілді.

Бұған дейін талантты әнші туралы «Шексіз музыка» атты кітап жарыққа шыққан еді.