0:00:00

Жаңалықтарды Telegram арнамыздан оқыңыз !

Батыс Қазақстан облысында Жайықтың жағалауын бекіту жұмысы басталды. Өйткені өзен жағасы жылдан жылға желініп, су арнасы қалаға қарай жылжып келеді. Тасқынның алдын алу үшін қар шығарылып, су сорғызылып жатыр.

Өңірде қыста қар қалың түскен жоқ. Дегенмен, ай басында жауған ақ ұлпа қала тұрғындарын біраз әбігерге салды. Қарғын су Деркөл кентіндегі мына тасжолды шайып өтіп, үйлердің ауласы мен көшелерді су басты.

Биыл көктем ерте келді. Күн күрт жылынып, қар суы жан-жаққа жайылды. Әсіресе Зачаган, Деркөл кенттері мен ескі әуежай, «Жұлдыз» шағын аудандарында көшелер көлшікке айналды. Абырой болғанда, тұрғын үйлерге су кірген жоқ.

Былтырғы алапат тасқын Жайық өзенінің жағалауын бекіту қажеттігін көрсетті. Қаланың оңтүстік бөлігінде дария жағасы қарқынды эрозияға ұшыраған. Салдарынан өзен арнасы осы аумақтағы тұрғын үйлерге жетіп, қауіп төндіріп тұр. Ақпанда жағалауды бекітуге 1 млрд 675 млн теңге қаражат қаралып, жұмыс басталды. Жағалау екі учаскеге бөлінген.

Сағадат Макасов, учаске басшысы:

Алаң дайын болғасын, жоба бойынша қазық қағамыз. Үстінен бетон құямыз. Содан кейін топырақ тасып, жақтау жасаймыз да, плита саламыз. Бетон плитаның үстінде тротуар болады.

Наурыздың 10-ында төтенше жағдайлар департаменті жанынан облыстық штаб құрылып, жедел желі іске қосылды. Күні бүгінге 70-ке жуық өтініш қабылданған. Ал қалалық штабта «ауламызды, көшемізді су басты» деген тұрғындардан 400-ге жуық шақырту түскен. Штаб мүшелері жағдайды жіті бақылап, күні-түні күшейтілген тәртіпте жұмыс істеп жатыр.

Жарас Көпжасаров, облыстық ТЖД жедел басқару және жоспарлау орталығы бастығының орынбасары:

Бүгінгі күні Бәйтерек ауданының Зелёное, Белес ауылдарында төтенше жағдайлар департаменті мен Төтенше жағдайлар министрлігінің 2-ші құтқару батальонының қызметкерлері инертті материалдарды қаптарға салу, дайындыққа келтіру жұмыстарына жұмылдырылды. Облыс тұрғындарын сабырлық сақтауға шақырамыз. Өтінімдер 112 немесе 55-40-77 нөмірлері арқылы қабылданады.

Өзендерде сең кептелісін болдырмас үшін мұз жару басталды. Тасқынның алдын алу шарасы Деркөл, Шаған, Өлеңті, Шыңғырлау арналарының 96 учаскесінде жоспарланған. Аймақта 1 млнға жуық текше метр қар шығарылды. 130 мың текше метр су сорылды.

Бақытжан Нарымбетов, облыс әкімінің орынбасары:

Ең басты міндет, біздің алдымызда тұрған, бұл — бірде-бір үйге су кірмеуі керек. Бізде 2 мыңға жуық арнайы техника дайын. Барлық кезеңге сақадай саймыз. Жұмысымыз мығым.

«ҚазГидроМет» мамандары аймақта күн +16 градусқа дейін жылып, өзен деңгейі көтерілетінін ескертті.

Ардақ Мұратқызы