Бұл туралы «Өрлеу» Біліктілікті арттыру ұлттық орталығы мәлім қылды, деп хабарлайды Egemen.kz.

Сәуір айынан бастап оқушылардың кәсіптік бағдарлануы бойынша орта білім беру педагогтерінің біліктіліктерін арттыру курстары басталады. 2025 жылы 805 педагогті оқыту жоспарланып отыр.

Курстар шеңберінде олардың кәсіби және тұлғалық қасиеттерін дамыта отырып, заманауи әлемдік тенденцияларды зерттеуіне, кәсіптік бағдар берудің түрлі әдістері мен форматтарын игеруіне мүмкіндік беріледі. Бағдарламада практикалық сабақтар, талқылаулар, кейстерді талдау және көшпелі семинарлар қамтылады.

«Кәсіптік бағдарлаудың негізгі міндеттерінің бірі – жоғары сынып оқушыларының әртүрлі кәсіптер туралы ақпаратты сыни тұрғыдан қабылдауы мен талдау дағдыларын қалыптастыру. Болашақ мамандықты саналы түрде таңдау оқушыларға академиялық үлгерімді арттыруға көмектеседі. Сонымен қатар кәсіптік бағдарлау ойындары, шеберлік сыныптары мен тренингтер оқушылардың коммуникативті, аналитикалық және шығармашылық дағдыларын дамытуға мүмкіндік беретін сұранысқа ие құралдарға айналып отыр. Осы әдістердің барлығын педагогтер курс шеңберіңнде үйренеді», деп атап өтті «Өрлеу» басқармасының төрағасы Айдана Шилибекова.

Оқытуға отандық және халықаралық жетекші сарапшылар қатысады. Курс бағдарламасы 3 аптаға арналған, содан кейін мұғалімдер біліктілікті арттыру сертификаттарын алады. Ол жыл соңына дейін іске асырылатын болады.