0:00:00

Жаңалықтарды Telegram арнамыздан оқыңыз!

Жамбылда еліміздегі жалғыз тау-егерлі полкының әскерилері әз Наурызды ұлттық ойындарды паш етумен бастады. Жауынгерлер аударыспаққа шығып, теңгі іліп, көкпар да тартты. Тау баурайының барлаушылары бәсекеге түскен спорттық сайысқа Данияр Әлімқұл да барып, қыз қууға қатысып қайтты.

Иә, бұл кәнігі көкпар клубының командасы емес. 51-ші тау-егерлі полкындағы жауынгер жігіттерден жасақталған құрам. Мұндағы әскерилер биік таудың басында жүріп, жау әскерін жайратуға машықтанған. Олар Алатауды аралап, Қаратаудың қойнауын барлайды. Ат үстінде жүретіндіктен аударыспақ тау ротасындағы тарпаң жігіттерге таңсық спорт емес.

Елнұр Пернебек, рота командирі:

Ат пен адамның бір-біріне деген сенімділігін арттыратын спорттың бір түрі ол қазақтың ұлы күресі – аударыспақ. Оларды көрмеген, қалада өскен неше түрлі балалар бар. Соны ұмытпау мақсатында біз күніне болмаса да айына, аптасына бір рет соларды машықтап, сонымен айналысып отырамыз.

Ал ат үстінде шауып келе жатып жерде жатқан қаруына қол созатын барлаушыларға теңге ілу сөз болып па? Әскер сапындағы әйелдер де қыз қуу спортына көрік берді.

Данияр Әлімқұл, тілші:

Әр жыл сайын әскерилер әз наурызды тау баурайында тойлап, ұлттық ойындарды да ұмыт қалдырмайды. Ендеше мен де қыз қууға қатысайын. Жауынгер ару жеткізе ме, жоқ па – көрейік.

«Жебе» атты жүйрік ат жеткізбеді. Расында мұндағы жабылардың бабы бөлек.

Алмас Отыншынов, полк командирі:

Бізде 80-нен аса атымыз бар. Атап айтқанда таулы егерлі ротасына және жүк тасымалдау ротасына. Бір сарбазға бір атты үйрету үшін қазіргі кезде бір айдан екі айға дейінгі уақыт кетеді.

Жауынгерлік жасақ ұлттық ойындарды ширатумен шектелмеді. Ат үстіндегі ұрыс тәсілдерін де көрсетті. Ал сайыс соңында қазан асылып, бауырсақ пісірілді.

Данияр Әлімқұл