Сыбайлас жемқорлыққа қарсы іс-қимыл агенттігі төрағасының орынбасары Дархан Құрақбаев сенат кулуарында Арғын Нығматулинге қатысты іске пікір білдірді, деп хабарлайды KAZ.NUR.KZ.

Дархан Құрақбаев Арғын Нығматулинге қатысты тергеуді басқа ведомство жүргізіп жатқанын, ал Антикор тек іздеу жұмыстарын жүргізіп жатқанын еске салды.

"Біз оның тергеу басталғанға дейін біраз уақыт бұрын Қазақстаннан кетіп қалғанын білеміз. Ол – Қазақстанда емес. Оны іздеу және қайтару бойынша шаралар жүргізіліп жатыр. Іздеу жұмыстары барлық елде жүргізілуде – оған мемлекетаралық іздеу жарияланған", — деді Дархан Құрақбаев тілшілер сұрағына жауап бере отырып.

Естеріңізге сала кетейік, бұған дейін мәжілістің бұрынғы спикері Нұрлан Нығматулиннің ағасы Арғын Нығматулинге іздеу жарияланғанын хабарлаған едік.

Кейін Бас прокуратура Арғын Нығматулинге не себепті іздеу жарияланғанын мәлімдеді.

Арғын Нығматулин және өзге де тұлғалар Қарағанды облысында хоккейді дамытуға бөлінген бюджет қаражатын жымқырды деген күдікке ілінген.