Сауд Арабиясына жылына бір рет жасалатын үлкен қажылық рәсіміне 1,5 млн-ға жуық адам барды, деп хабарлайды 24kz.

Олардың 270 мыңға жуығы Меккеге рұқсатсыз өтпек болған. Олар кері қайтарылды. Бұл туралы жергілікті билік хабарлады. Ережені бұзған 23 мыңнан астам азаматқа айыппұл салынып, 400-ден астам қажылық компаниясының лицензиясы кері қайтарылған. Ережеге сәйкес құлшылықтың бұл түрін тек арнайы рұқсаты бар адамдар ғана өтеуге құқылы. Тіпті Меккедегі жергілікті тұрғындардың өзіне де рұқсат қажет. Ережені елемегендерге 5 мың АҚШ доллары көлемінде айыппұл немесе бірден депортациялау қарастырылған.

Мохаммад Бин Абдаллах Аль-Бассами, қоғамдық қауіпсіздік қызметінің өкілі:

- Қауіпсіздік органдары қажылық ұйымдастырушы компания ретінде жалған құжат әзірлеген 415 кеңсе мен жеке тұлғаларды анықтады. Оларға заңға сәйкес қажетті шара қолданылып, істері прокуратураға жолданды. Қазірге дейін Меккедегі бақылау-өткізу бекетінен 269 мың адам кері қайтарылды.