Бүгін Шерзат Полаттың өліміне кінәлі деп танылған күдіктілерге қатысты сот үкімі шығарылады. Осылайша, бүгін бүкіл Қазақстан мұқият бақылаған оқиғаның ақырғы нүктесі қойылмақ .

Сәуірде басталған сот отырысы түгелдей тікелей эфирде көрсетілді. Онлайн режимде қоғам бәрін бақылап отырды. Сарапшылар әділ үкім күтетіндерін жаппай жазып, қоғамның қолдауын күтуде, деп хабарлайды Caravan.kz медиа порталы.

Заңгер Ляззят Ахатова өзінің Facebook парақшасында пікір білдірді.

Былтырдан бері сот отырысы тікелей эфирде жүргізіле бастағанын білесіздер. Қоғамда резонанс туғызған бірнеше істі осылай бақыладық. Бұдан бөлек, көпшілік біле бермейтін басқа да істер онлайн режимде көрсетілді. Мұның бәрі мемлекеттің сот жүйесі жұмысын барынша ашық жүргізуге жасаған қадамы ретінде қарастырған жөн.

Оның үстіне, сот отырысын тікелей эфирде көрсету арқылы миллиондаған адам сот жүйесінің нақты қалай жұмыс істейтінін біледі. Әділ шешім шығарылғанын көргеннен кейін сенім туындайды. Құқықтық сауат та артады. Бұрынғыдай бармақ басты, көз қысты болмайды. Жалпы, осындай резонансты оқиғаларды ашық көрсету арқылы еліміздегі сот жүйесіне қатысты таптаурын пікірді өзгерте аламыз.

Мемлекеттік айыптаушы тарап та, судья да сот отырысын барынша ашық, әділ жүргізді. Қоғам болған соң, түрлі пікір айтылатыны түсінікті. Алайда судья да, прокурор да заңнан аттап кете алмайды. Эмоцияға салынып шешім қабылдамайды, заңның аясында жұмыс істейді.

«Қоғамда әділдік орнағанын, ашықтық болғанын талап етеміз ғой. Осындай оқиғалардың тікелей эфирде көрсетілгені осы бағытта атқарылған жұмыстың нәтижесі деп білемін. Шерзат Полаттың өліміне қатысты істі қылмыстық процесс ғана емес, еліміздегі құқық жүйесінің ашықтығы мен әділеттілік деңгейінің сынағы ретінде қарастырған жөн. Бұл оқиғаның ашық өтіп, эфирден көрсетілуі және оны мыңдаған адамның қарауы қоғамның әділдікті талап ететінінің белгісі», — деп пікір білдірді заңгер Ляззат Ахатова.

Айта кетейік, осыған дейін 3 маусымда Шерзат Полаттың өліміне айыптау жөніндегі қылмыстық іс бойынша кезекті сот отырысы өткен болатын. Күннің бірінші жартысындағы сот жарыссөзінде адвокаттар мен сотталушылардың өкілдері сөз сөйледі. Сотталушылар да соңғы сөздерін айтты.

Енді бүгін сот үкімін жариялау үшін сот отырысы 5 маусымға сағат 16.00-де өтеді.