Бүгін Құрбан айт мерекесінің алғашқы күні. Барша мұсылман қауым қасиетті мейрамды құлшылықпен бастау үшін таңалакеуімнен мешітке асығып, Айт намазын оқыды. Ал мал базарларында құрбан шалынып, оның еті кедей-кепшікке таратылып жатыр. Бұл қайырымдылық қана емес, ішкі жан-дүниені тазартып, рухани жаңаратын уақыт. Елорда тұрғындары мерекені қалай қарсы алды?

Ислам әлемінде екі ұлы мереке бар. Оның бірі Ораза айт болса, екіншісі – Құрбан айт. Қасиетті мейрамды мұсылман қауым ерекше ықыласпен қарсы алады. Құрбан шалып, жоқ-жітіктерге жәрдемдеседі. Туыстарымен қауышып, қонақ күтеді. Үш күнге созылатын бұл мереке Айт намазымен басталады. Таңсәріден мешітке ағылған жамағат дұға жасап, бір-бірін Айт мерекесімен құттықтайды.

Біз де мейірім мерекесін Бас мешітте қарсы алдық. Мұнда таңмен таласа, құлшылық орнына ағылғандардың қарасы қалың. Аумағы атшаптырым алып ғибадат орны лық толы. Жиналған жамағат алдымен уағыз тыңдап, кейін құлшылығын намазбен жалғады.

Айт намазынан кейін мұсылман қауым мәз-мейрам. Бір-бірін мерекемен құттықтап, төс қағыстыра қауышты. Басым бөлігі мешітке отбасымен келген. Дайындықтары тыңғылықты. Бірі ағайын-бауырды түгендеп, қонақ күтуге асықса, енді құрбан шалып, мұқтаж жандардың жыртығын жамауды жоспарлап отыр.

Дін өкілдерінің айтуынша, алдағы үш күн бойы кедей-кепшікке көмектесіп, жақсылық жасау – сауабы мол іс. Тек ет таратумен шектелмей, бұл күндері жағымды сөз, жылы тілек те айтылуға тиіс. Сондай-ақ мейірім мерекесінде ренжіскен мұсылмандар татуласып, арасы алыстаған ағайындар жақындасқаны жөн.

Наурызбай қажы Тағанұлы, ҚМДБ төрағасы, Бас мүфти:

- Айт күні мереке болғаннан кейін бұл күн әр мұсылманның жүзінен мерекелік көрініс көрінуі тиіс. Яғни оның күлімсіреген жүзі, мейірімділігі, қайырымдылығыменен әр мұсылман қоғамға өзін осылай көрсеткені көрікті бейнесінің көрінісі болады. Мұсылман дінінің кереметтілігі сонда. Әр мерекеде мұқтаждар ескеріледі. Оның терісі, еті Аллаға жетпейді. Адамның ниеті жетеді. Адамдарға азық ретінде үлкен қолдау болады.

Құрбан шалу кезінде қоршаған ортаны ластамай, тазалық сақтау да жамағатқа жиі айтылды. Барлық рәсім байыпты, өркениетке сай жасалуына мән беріліп жатыр. Құрбан айт рухани тазару һәм жақсылық ғана емес, түрлі этностар арасындағы достық мерекесіне айналды. Бұл күні азаматтар бірін-бірі сыйлықпен қуантқаны жақсы үрдіске баланады.

Сансызбай қажы Құрбанұлы, ҚМДБ төрағасының орынбасары, Шариғат және пәтуа бөлімінің меңгерушісі:

- Пайғамбарымыз: «Бір-біріңе сыйлық беріңдер, араларыңда махаббат оянады», – деді. «Айт құтты болсын, айттық сенен», – дейді. Енді қолдан келгенін берген нәрсені қуанышпен қарсы алу керек. Аз демей, көп демей, шүкірлік қылады оған. Әсіресе тұрмысқа шыққан апамыз бар, қарындасымыз бар. Қазір Kaspi бар, 10 мың, 5 мың аударып қою, жақсы сөз, тілек те сыйлық болып есетептеледі.

Құрбандық үш күнге жалғасады. Материалдық мүмкіндігі бар əрі жолаушы емес мұсылманға құрбандық шалу – уəжіп, яғни міндет. Алайда шамасы келмеген адамға мұндай талап қойылмайды. Одан бөлек, Айт күндері садақа беріп, қараусыз қалған қарттарға, жетімдер мен көпбалалы отбасыларға көңіл бөлу сауапты іс саналады.

Авторлары: Бекзат Аманов, Жандос Битабаров