Жамбыл облысы бойынша экология департаментінің басшысы сотталды, — деп хабарлайды Massaget.kz тілшісі Сыбайлас жемқорлыққа қарсы іс-қимыл агенттігіне сілтеме жасап.

"Тараз қаласының сотымен Жамбыл облысы бойынша экология департаментінің басшысы Смағұлов Т., "Тараз металлургия зауыты" ЖШС бас директорының орынбасары Полатбеков Б. және осы кәсіпорынның экологы Асан М. сотталды", – делінген хабарламада.

Хабарламада атап өтілгендей, Смағұлов пара алғаны, ал зауыт өкілдері экологиялық заңнаманың сақталуын тексеру кезінде бұзушылықтарды жою мүмкіндігін беру және жалпы қамқорлық көрсету үшін пара бергені үшін кінәлі деп танылды.

"Смағұлов, Полатбеков және Асан жалпы сомасы 24 миллион теңге көлемінде айыппұл түріндегі жазаға кесілді. Сонымен қатар, олар өмір бойына мемлекеттік қызметте және квазимемлекеттік сектор субъектілерінде қызмет атқару құқығынан айырылды", – делінген хабарламада.

Сот үкімі заңды күшіне енді.

Еске сала кетейік, бұған дейін Ұлытау облысы бойынша сыбайлас жемқорлыққа қарсы қызмет кәсіпкерге экология саласындағы рұқсат беру құжаттарын беру үшін 2,5 миллион теңге пара алды деген күдікпен облыстық экология департаментінің басшысын ұстаған болатын.

Өзекті жаңалықтарды өз уақытында оқу үшін Facebook парақшамызға жазылыңыз!