2 наурыз күні Шымкенттен Астанаға бағыт алған ұшақта есінен танған 20 жастағы студент қызды ұшақта болған реаниматолог дәрігер құтқарып қалған. Ол оқиға болған ұшақтан кешігіп басқа рейспен ұшқанын айтады. Ол бұл жайт кездейсоқ болмағанына сенімді, деп хабарлайды "Қазақстан" телеарнасы.

Телеарна хабарлауынша, ұшақта есінен танып қалған қыздың қан қысымы нөлге түсіп кеткен.

Астана қаласындағы "№2 көпбейінді қалалық балалар ауруханасының" анестезиолог-реаниматологы Нұрсұлтан Құрбанбековтің айтуынша, ұшақтың қонуына жарты сағат қалғанда бортсеріктер жолаушылардың бірі өзін жайсыз сезініп, есінен танып қалғанын айтып, көмек сұраған. Сол сәтте Нұрсұлтан және тағы бірнеше дәрігер тез қимылдап, алғашқы көмекті дер кезінде көрсетіп үлгерген. Соның арқасында өрімдей қыз ажал аузынан аман қалды.

Нұрсұлтанның айтуынша, сол күні ол басқа рейспен ұшуы керек болған. Бірақ, билетті рәсімдеу кезінде қателік кетіп, рейсін ауыстырған. 35 жастағы дәрігер бұның кездейсоқтық емес екеніне сенеді. Өйткені өмірінде мұндай жағдай бұрын-соңды болмапты.

"Жүрек қан тамырлары ауруларында немесе тыныс жолы аурулары бар науқастарда осы жағдайда осындай жағдай болуы мүмкін. 40 төменгі жағы 0 болды. Одан кейін аяғын тағы көтеріп, тыныс алуын жақсарту мақсатында кеудесін қысып тұрған киімдерін босаттық. Одан кейін қант деңгейінің төмендеуіне байланысты науқас есін жинағаннан кейін кофеге қант қосып бердік. Науқастың жағдайы 2-3 минут арасында жақсарды. Мен ерлік жасадым деп айта алмаймын. Бұл менің күнделікті жұмысым", — дейді анестезиолог-реаниматолог.