Бүгін өңірдегі елдердің назары Астанаға ауды. Орталық Азия бұқаралық ақпарат құралдары елімізде өтіп жатқан саммит туралы жарыса жазып жатыр. Сарапшылар: « Басқосу Қытай мен аймақ елдері арасындағы байланысты нығайтып, экономикалық, әлеуметтік және ғылыми-технологиялық салаларға тың серпін береді», — дейді.

Орталық Азия елдері мен Қытай арасындағы қарым-қатынас жаңа кезеңге аяқ басты. Астанадағы басқосу соның бір дәлелі. Ынтымақтастық тараптарға ұлттық мүддесін ескере отырып, аймақтағы мәселелерге баса назар аударуға мүмкіндік береді. Бұл – «Кешкі Бішкек» басылымына сұхбат берген заң ғылымдарының докторы Дин Цзяньвэйдің пікірі. Оның сөзінше, саммит тараптар арасындағы сауда-экономикалық байланысты нығайтып қана қоймай, әлеуметтік және ғылыми-техникалық әріптестікке серпін береді. Кездесудің қазақ жерінде өтуі бекер емес. Сарапшы: «Бұл Астананың өңірдегі рөлі мен Қытаймен табысты серіктестігін көресетеді, — дейді.

UzA: Астанадағы саммиттің стратегиялық маңызы зор

Астанадағы саммит Өзбекстан үшін стратегиялық маңызға ие. UzA агенттігі келтірген мәліметке қарағанда, Ташкент аймақтың біртұтастығын нығайтып, ауқымды жобаларды іске асыруда күш біріктіру қажет екенін жақсы біледі. Ал, Қытайдың экономикалық пен технологиялық әлеуеті зор.

Бұл Орталық Азия елдері үшін жаңа мүмкіндіктерге жол ашады. Автордың сөзінше, 2025 жылы Еуразия кеңістігінде сыртқы қауіпке төтеп бере алатын қарым-қатынас құрылуы мүмкін.

А.Акматалиев: Саммит Орталық Азия – Қытай қарым-қатынасына тың серпін береді.

Арқа төсіндегі саммит Орталық Азия – Қытай қарым-қатынасына тың серпін береді. Мұны қытайлық «Синьхуа» агенттігіне берген сұхбатында Қырғыз Республикасының Президенті жанындағы мемлекеттік басқару академиясының бұрынғы ректоры Алмазбек Акматалиев мәлімдеді. Оның айтуынша, Қытай Орталық Азия елдерін біртұтас саяси-экономикалық серіктес ретінде қабылдайды.

Бұл ірі инвестициялық жобаларды бірлесіп жүзеге асыруға жол ашады. Сарапшы бұл саммитті Қытай мен Орталық Азия елдері арасындағы байланыстың «алтын отыз жылдығына» балады.

Авторлары: Зайнұр Байжігіт, Тамерлан Ким