Қызылордалық диқандар күріш жинау науқанына кірісті.

Шаруалар 80 мың гектардан астам алқапты бір жарым айда орып шығуды жоспарлап отыр. Биыл өңірде су тапшы болғаны белгілі. Күріш алқабы да 8 мың гектарға қысқарды. «Қиындыққа қарамастан өнім көлемі былтырғы мөлшерден кем болмайды. Қамбаға жарты миллион тоннаға жуық өнім құямыз» — дейді мамандар.

Биыл Темірбек Жүргенов ауылына 1700 гектар күріш егілді. Су тапшылығына байланысты егінді тіршілік нәрімен уақытылы қамту үшін коллектордағы суды қайта пайдалануға тура келген. Осындай шаралардың арқасында ала жаздайғы еңбек еш кеткен жоқ.

Байниязов Нұрпейіс, егінші:

- 42 гектар жер бөлінді, соған былтыр гектарына 101 центнерден өнім бердім. Биыл сол былтырғы өнім бар деп, одан да жоғарғы болуы мүмкін.

Темірбек Жүргенов ауылының диқандары орта есеппен әр гектардан 80 центнерден күріш жинауға ниетті. Заманауи үлгідегі комбайндар арқылы бұл жұмысты ерте аяқтамақ.

Асылхан Шекебаев, инженер:

- Олардың жылдамдығы жақсы. Мысалы, бір атыз 2,5 гектар болатын болса, 35 минутта орып, шығып кете береді.

Облыста 80 мың гектар жерге күріш егілді. Бұл – өңірдегі барлық егіс көлемінің 42 пайызы. Бүгінде ерте пісетін дәнді-дақылдар мен мал азығын жинау жұмыстары аяқталуға жақын. Ал күріш орағы қазан айының ортасына дейін жалғасады.

Биыл өңірде егінді шашпай-төкпей жинап алу үшін 4 мыңнан астам техника жұмылдырылмақ. Ал күріштің әр гектарынан 50 центнерден астам өнім жинау жоспарланып отыр.

Талғат Дүйсебаев, Ауыл шаруашылығы басқармасының басшысы:

- Мемлекет басшысы, Үкіметтің дер кезінде араласуының арқасында Сырдария өзенінің жоғарыда орналасқан мемлекеттермен мерзімінде жүргізілген келіссөздің нәтижесінде облысқа тиісті бөлінген су жеткізілді. Биыл нәтижелі жыл болды. 500 мың тоннаға жуық өнім жинаймыз деген болжамымыз бар.

Күзгі жиын-терім науқанына мемлекет тарапынан берілетін арзан жанармайдан тапшылық жоқ,-дейді мамандар.

Нұрлан Жақыпбеков, Ақан Әлиев, 24KZ