Ақтөбе облысында жыл соңына дейін бір миллион шаршы метр баспана қолданысқа беріледі.

Бұл былтырмен салыстырғанда шамамен 350 мың шаршы метрге көп. Бұған жеке құрылыс компанияларының көпқабатты үйлері, бюджет қаражаты есебінен салынатын нысандар және жеке үйлер кіреді.

Ақтөбеде Есет батыр тұрғын алабындағы мынау көпқабатты үй жақында тапсырылады. Қазір айналасын абаттандыру ғана қалды. Пәтерлер мемлекеттік бағдарлама аясында тиімді несиеге беріледі.

Алтай Бекенов, мердігер компания директорының орынбасары:

- 9 қабатты үй, үш подъездік. жалпы 108 пәтер бар. Оның ішінде 72 үш бөлмелі пәтер, 36 екі бөлмелі пәтер. Бізде жұмыстарымыз енді жалпы чистовая отделка жүріп жатқан барлығы. Адамдар бірден көшіп келіп тұра береді.

Облыс орталығында осындай несие шарттары бар төмен 10 үй салынып жатыр. Жыл соңына дейін бесеуінің кілті тапсырылады.

Аслан Жарасбаев құрылыс, сәулет және қала құрылысы басқармасы басшысының орынбасары:

- 9 айдың қорытындысы бойынша 600 мыңға жуық шаршы метр пайдалануға берілді. Бұл былтырғы жылмен салыстырғанда 2,6 пайыз өсімді құрап отыр. Жывлдың соңына дейін 400 мыңға жуық тұрғын үй пайдалануға беру жоспарланып отыр.

Ал әлеуметтік осал топқа жататын отбасыларға қарастырылған баспаналар нарықтағы дайын үйлерден саудаланады. Бұл мақсатқа жергілікті бюджеттен 12 млрд теңге бөлінеді. Бұл 800-ден артық пәтерге жетеді.

Бауыржан Жантөрин, қалалық құрылыс бөлімі басшысының міндетін атқарушы:

- Пәтер сатып алу конкурсы жарияланды. Басты талап — төртінші жайлылық класына жататын үй соңғы жарты жылда қолданысқа берілген болуы тиіс. Олар қосымша жөндеуді қажет етпей, өмір сүруге дайын болуы шарт.

Қазір үй кезегінде 35 мың облыс тұрғыны тіркелген. Көп балалы отбасылар, жетім балалар және мүгедектігі бар жандарға баспана сатып алу келер жылы да жалғасады. Мамандар бұл мақсатта салалық министрлікке бюджеттік өтінім жолдап, оң қорытынды алған. Шамамен 3 миллиардтан астам теңге бөлінеді деп жоспарланған.

Мансұр Есқожин, Айнадин Молдабеков, Айбек Даутов