Мемлекеттік кірістер комитеті қазақстандық компаниялар хабарлама алғаннан кейін бюджетке 17 миллиард теңге салық төлегенін мәлімдеді, — деп хабарлайды Massaget.kz тілшісі.

Қаржы министрлігінің мәлімдемесі

Мемлекеттік кірістер комитеті мәліметінше, 633 салық төлеушіге, соның ішінде 172 құрылыс саласында (ірі құрылыс компаниялары да бар), 102 сауда және басқа да қызмет түрлерімен айналысатын компанияларға салық салынатын кірістерін төмендету белгілері бойынша хабарлама жіберілген.

"12 наурыздағы жағдай бойынша салық төлеушілер қосымша есеп нысандарын тапсырып, салықтарын толықтырып жатыр. Қазір 17 млрд теңге төленді, оның ішінде BI Group және BAZIS компаниялары да төледі. Деректер салыстырылып жатыр", — деп жазылған хабарламада.

Мемлекеттік кірістер комитеті салық төлеушілерді салық заңнамасы талаптарын қатаң сақтауға шақырды.

Бұған дейінгі жағдай

Еске салайық, бұған дейін премьер-министр Олжас Бектенов вице-премьер-ұлттық экономика министрі Серік Жұманғаринмен және қаржы министрі Мәди Такиевпен бірге жұмыс кеңесін өткізді.

Олжас Бектенов кәсіпкерлерден екі апта ішінде салық органдарына қосымша салық декларацияларын тапсыруды және шынайы салық сомасын төлеуді сұрады:

"Бізде осындай ірі компаниялардың толық тізімі бар. Ол тізімде BI Group, BAZIS және басқа да көптеген ірі құрылыс компаниясы жүр. Экономиканың басқа салаларында жұмыс істейтін белгілі әрі танымал мейрамханалар, фитнес-клубтар және әртүрлі компаниялар бар".

Қызықты жаңалықтар мен видеоларды көру үшін TikTok арнамызға жазылыңыз!