Меруерт Қамалетдинова шахматтан халықаралық жарыстың жүлдегері атанды.

Ол Испанияда өткен ірі турнирде сәтті өнер көрсетіп, күміс медальды қанжығасына байлады. Жерлесіміз тек үндістандық спортшыға есе жіберді.

Бокстан әлем чемпионатында 6 спортшымыз жартылай финалға жолдама алды. Кеше ширек финалдық айқастар аяқталып, 10 отандасымыздың 6-ы ақтық сынға бір табан жақындады. Олардың арасында 48 келіде Теміртас Жүсіпов, 54 келіде Сәкен Бибосынов, 57 келіде Оразбек Асылқұлов және 63,5 келіде Ертуған Зейнуллинов пен 71 келідегі Абылайхан Жүсіпов, 75 келіде Сабыржан Аққалықов бар. Яғни қоржынға 6 медаль түсті деген сөз. Сондай-ақ жартылай финалға өткендер саны бойынша Қазақстан үздік үштікте. Бұл тұрғыда Ресейдің 13, Өзбекстаннан 9 боксшы 1/2 финалға жолдама алып отыр.

Сәкен Бибосынов, Бокстан ұлттық құрама мүшесі:

- Иә, зерттегенбіз. Ол да бізді жақсы зерттепті. Өз жағымнан қателіктер болды, мойындаймын. Дегенмен жеңіске жеттім. Енді ертең жартылай финал. Ешқандай қателік жібермей, тыңғылықты дайындалып, жеңіске жету керек. Непалдық қарсыласымды зерттеймін. Бұйырса ертең өте жақсы жекпе-жек көрсетемін.

Айта кетейік, Дубайдағы дүбірлі дода 13 желтоқсанға дейін жалғасады. Жарысқа әлемнің 95 елінен былғары қолғап шеберлері қатысып жатыр. Одан бөлек чемпионаттың жүлде қоры да өте қомақты. Яғни чемпиондарға 300 мың доллар, күміске 150 мың, қола жүлдегерге 75 мың доллар көлемінде қаржылай сыйақы беріледі. Тіпті ширек финалистердің өзі 10 мың доллар көлемінде ақша алады.

Абылайхан Жүсіпов, Бокстан ұлттық құрама мүшесі:

- 1-раунд сәл қиын болды. Кілтін таппай қалдым. Ол екінші раундта қатты ішке өтті. Соны көріп, темп көтердім. Көбірек ішінен ұрдым. Оның қателіктерін пайдаланып, ойымдағыны істедім.

«Астана аренада» жаңа рекорд тіркелді

«Қайрат» пен «Олимпиакостың» ойыны чемпиондар лигасында жаңа рекорд орнатты. Казгидрометтің мәліметінше, матч басталған сәтте елордада ауа температурасы -21 градус болған. Сәйкесінше, бұл ресми түрде чемпиондар лигасы тарихындағы ең суық ойын болып тіркелді. Бұған дейінгі рекорд 2007 жылы Мәскеудегі «Лужники» стадионында тіркелді. Ол кезде сынап бағанасы 14 градус суықты көрсеткен.

ҚПЛ үздіктері анықталды

Футболдан Қазақстан премьер-лигасының үздіктері марапатталды. Дастан Сәтбаев ішкі біріншіліктің ең үздік ойыншысы атанды. Ол өткен маусымда 26 матчқа қатысып, 15 гол соқты әрі 6 голдық пас берді. «Қайрат» клубының тағы бір өкілі Темірлан Анарбековке үздік қақпашы атағы бұйырды. Ақтөбелік Бағдат Қайыров үздік қорғаушы атанса, Елімай сапындағы Ғалымжан Кенжебекке үздік жартылай қорғаушы атағы берілді. Сондай-ақ Тобыл ойыншысы Ислам Чесноков үздік шабуылшы атанса, үздік бапкер номинациясын сөзсіз Қайраттың бас бапкері Рафаель Уразбахтин алды.