Бурабайда Ұлттық құрылтайдың жұмыс секцияларының отырыстары күні бойы жалғасты. Құрылтай мүшелері «Азаматтық қоғам», «Мәдениет. Өнер. Руханият», « Білім және ғылым», «Әлеуметтік-экономикалық даму» секциялары аясында өзекті мәселелерді талқылап жатыр, деп хабарлайды Egemen.kz.

Секциялар жұмысына Үкімет пен орталық мемлекеттік органдардың өкілдері қатысып, құрылтайдың өткен жылы наурыз айында Атырау қаласында өткен үшінші отырысында көтерілген бастамалардың жүзеге асырылу барысы туралы баяндады.

2024 жылғы 1 қыркүйектен бастап еліміздің барлық орта білім беру ұйымдарында енгізілген Жаңартылған тәрбие жұмысы бағдарламасының алғашқы нәтижелері қарастырылып жатыр.

Құрылтай мүшелері өз сөздерінде жалпыұлттық құндылықтарды одан әрі дамыту қажеттілігіне назар аударды. Биылғы «Жұмысшы мамандықтар жылы» аясында еңбекқорлық пен кәсібилік құндылықтарын дәріптеуге ерекше мән берілді.

Сондай-ақ, жұмыс секцияларының қатысушылары білім мен ғылымды қолдау және дамыту бойынша қабылданған шараларды оң бағалады. «Жайлы мектеп» бағдарламасының нәтижелері, стипендиялардың көтерілуі, шетелдік ЖОО-лардың жаңа филиалдарының ашылуы, көрнекті ғалымдар мен педагогтардың мемлекеттік марапаттармен ынталандырылуы ерекше атап өтілді.

Құрылтай мүшелері мемлекет пен қоғамның әлеуметтік кеселдерге қарсы бірлескен жұмысына да назар аударды. Лудоманияға қарсы кешенді жоспардың, есірткіге қарсы күрес жоспарының алғашқы нәтижелері қаралды. Сондай-ақ, 2024 жылы 16 маусымда күшіне енген тұрмыстық зорлық-зомбылыққа қарсы күрес туралы заңнан кейін әйелдер мен балалардың құқықтарын қорғау жүйесінің тиімділігі айтылды.

Құрылтай мүшелері биылғы жылдың маңызды оқиғалары ретінде Мемлекеттік егемендіктің 35 жылдығына, Конституцияның 30 жылдығына, Жеңістің 80 жылдығына және Абайдың 180 жылдығына ерекше басымдық берді.

Сонымен қатар, құрылтай мүшелеріне Ұлттық құрылтайдың үшінші отырысында Президент Қ.Тоқаевтың энергетика, көлік, тұрғын үй құрылысы және газдандыру салаларындағы кең көлемді инфрақұрылымдық бастамаларын іске асыру нәтижелері туралы ақпарат берілді. Атап айтқанда, өткен жылы 2029 жылға дейінгі Ұлттық инфрақұрылымдық жоспар қабылданды. Оның аясында жалпы құны 40 трлн теңгеден асатын 200-ден астам жоба іске асырылмақ.

Секция жұмыстары өнімді диалог форматында өтіп, ұлттық құрылтай мүшелері өздерінің жаңа бастамаларын әріптестерімен және мүдделі мемлекеттік органдармен тікелей талқылады.

Жалпы, жұмыс секцияларының қатысушылары Ұлттық құрылтайдың үш жыл ішінде идеяларды ұсыну және қоғамның бірлігін нығайтуға бағытталған стратегиялық қадамдарды қалыптастырудың басты институтына айналғанын атап өтті.