Шығыс Қазақстан облысы жаңа жұмыс кестесіне көшті Шығыс Қазақстан облысы түгелдей жаңа жұмыс кестесіне көшті, деп хабарлайды КТК телеарнасы.

Бұл пилот жобаны Қатонқарағай ауданының тұрғындары бірінші болып бірауыздан қолдаған еді. Өйткені шығыста таң ерте атып, қараңғы тез түседі. Сондықтан облыс көлеміндегі барлық мекеме қызметкері жаңа жұмыс кестесіне көшуді ұйғарған. Енді өңірдің мемлекеттік және әлеуметтік мекемелері таңғы 08:00-ден кешкі 17:30-ға дейін жұмыс істейді. Ал түскі үзіліс 12:00-13:30 аралығында. Қабылданған жаңа кесте тұрғындардың күндізгі уақытын тиімді пайдалануына мүмкіндік бермек. Себебі атқамінерлер жұмысқа ерте келіп, ерте кету ұсынысын халықтың өзі жасады деп отыр.

"Бұл аудан тұрғындарының бастамасымен болған өзгеріс. Облыстан келген ақпаратты түсіндіру тобымен кездесу барасында жергілікті халық жұмыс кестесін ерте бастау керек екенін айтты. Себебі, біздің Зайсан елдің ең шығысында орналасқан аудан, күн ерте шығады. Халқымыздың көбі таңертең жұмысқа ерте кіріседі. Сол үшін мекемелердің қызмет көрсету режимі сол уақытқа ыңғайлану керек", — дейді Зайсан ауданының әкімі Аэлита Ахметсәлімқызы.

Сонымен бірге ШҚО-ның Катонқарағай ауданында биылдан бастап мемлекеттік және әлеуметтік мекемелер үшін жаңа жұмыс кестесі пилоттық режимде енгізілген. Бұл режимге ауданның 40 мекемесі көшкен.

Еске салсақ, бұған дейін 5 наурыздан бастап Шығыс Қазақстан облысындағы Тарбағатай, Зайсан, Күршім және Самар аудандарының тұрғындары үшін жұмыс күні 08:00-де басталып, 17:30-да аяқталатынын жазғанбыз.